La regenza grischuna ha reorganisà la gestiun da la marca regiunala "graubünden". A partir dal 1. da schaner 2017 vegn il secretariat da la marca manà en furma da mandat tras Gieri Spescha cun la firma clerezza ScRL. Grischun vacanzas, ch'era stà responsabel fin qua per la gestiun da la marca, aveva returnà questa incumbensa al chantun en il rom da la nova orientaziun da sia strategia.

Suenter ina fasa d'installaziun da plirs onns aveva la regenza grischuna surdà l'onn 2007 la gestiun da la marca locala "graubünden" a Grischun vacanzas (GRV), l'organisaziun per il marketing turistic. En il rom da la nova orientaziun strategica da GRV vegn ussa reglà da nov il management da la marca. Sco resultat da la procedura publica da submissiun vegn il mandat per manar il secretariat da la marca "graubünden" surdà per il 1. da schaner 2017 a Gieri Spescha cun la firma clerezza ScRL ch'è domiciliada a Flem.

En il rom da la nova strategia, ch'è vegnida deliberada la primavaira 2016 e ch'entra en vigur l'onn 2017, vul GRV sa focussar pli fitg sin sias incumbensas turisticas cun l'intent da gudagnar, ensemen cun ils partenaris, novs giasts per il Grischun. La strategia prevesa tranter auter in spustament davent da "marca ed image" vi ad "innovaziun e products", cun metter il focus sin il marketing da segments e sin la digitalisaziun. La gestiun da la marca na tutga consequentamain betg tar las cumpetenzas centralas che GRV vul sviluppar resp. extender per quest intent. GRV ha perquai supplitgà il chantun, ch'è proprietari da la marca "graubünden", da reglar da nov la gestiun da la marca regiunala che cumpiglia pliras branschas.

GRV ha gidà a concepir decisivamain il success da la marca "graubünden" dal cumenzament ennà. Cun il svilup da l'idea d'ina marca "NaturMetropole der Alpen" ha il management da la marca, ch'è domicilià tar GRV, stgaffì las basas tematicas per sviluppar vinavant la marca. Tras la restituziun dal mandat al chantun e tras la publicaziun uffiziala èn ussa er vegnidas fatgas las disposiziuns organisatoricas necessarias. En cumbinaziun cun l'idea da la marca "NaturMetropole der Alpen" porscha la nova surdada dal management da la marca la schanza unica a prestaziuns betg turisticas, ch'èn unidas sut il tetg da "graubünden" e che signifitgeschan ina plivalur substanziala da la marca regiunala, da sa far valair pli fitg.

GRV vegn a restar er vinavant in dals applitgaders e communicaturs ils pli impurtants en las structuras da la marca "graubünden" – saja quai cun francar las finamiras da la "NaturMetropole der Alpen" u saja quai en spezial er tar la cuntinuaziun da la campagna da success cun ils capricorns Gian e Giachen.

Cun surdar il mandat a Gieri Spescha, ch'è stà durant blers onns responsabel per la marca tar GRV, èsi garantì ch'il management da la marca vegn transferì senza difficultads e che la marca vegn sviluppada vinavant a la "NaturMetropole der Alpen".


Infurmaziuns:
Cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr.ch


Gremi: regenza
Funtauna: rg chanzlia chantunala dal Grischun