Cun il premi da la ARGE ALP 2017 duain vegnir undrads projects innovativs concernent l'integraziun en il territori alpin. Tschertgads vegnan projects che rinforzan la coesiun sociala en las regiuns commembras e l'identificaziun culturala cun il territori alpin tant dals indigens sco er dals novarrivads. En tut reparta ina giuria internaziunala ina summa da premi da 25 000 euros. Inoltrar lur project pon purtaders privats e publics. La fin dal termin d'annunzia è fixada per ils 31 da schaner 2017. Infurmaziuns pli detagliadas survegnis Vus sut www.argealp.org.

Bleras regiuns e regiuns parzialas en il territori dals stadis commembers da la ARGE ALP vegnan confruntadas dapi l'onn passà cun l'arriv d'in grond dumber da persunas da differentas derivanzas. Tras quai daventa nossa societad, ch'è en general pli eterogena, pli multifara er en dumondas culturalas, ideologicas, religiusas e socialas. La basa per ina buna convivenza en il territori alpin è ina chapientscha cuminaivla da las valurs fundamentalas d'ina collectivitad paschaivla, plain respect e democratica. Ina premissa essenziala per l'integraziun è perquai l'acceptanza da questas valurs fundamentalas e da las reglas da basa da la convivenza en nossa societad.

Tge projects vegnan tschertgads?
Per il premi da la ARGE ALP 2017 vegnan perquai tschertgads projects che rinforzan questas valurs fundamentalas cuminaivlas e che las rendan pli famigliaras a tut ils acturs participads. Il cuntegn dals projects po ir da purschidas simplas d'integraziun tras experimentar e concepir ensemen cun musica, sport, art e cultura fin a la furmaziun politica u a la preparaziun per la professiun. Puncts da referiment cun il territori alpin e cun sia identitad regiunala e culturala speziala èn giavischabels. In entretschament reussì d'in spiert cosmopolitic cun in spiert patriotic po sa mussar en spezial er en projects transcunfinals e cooperativs. Sche la prontezza da s'integrar d'ina vart va maun en maun ensemen cun l'avertadad e cun la toleranza da l'autra vart, po reussir ina buna integraziun.

Tgi po inoltrar projects?
Inoltrar lur projects pon iniziativas, collavuraziuns ed uniuns privatas sco er interpresas privatas e publicas, corporaziuns territorialas regiunalas u localas ed ulteriuras organisaziuns. Ina tscherta furma giuridica n'è betg necessaria.

Ils projects pon vegnir inoltrads fin ils 31 da schaner 2017 a:
Chanzlia chantunala dal Grischun
Tamara Kobler
Servetsch da medias
Reichsgasse 35, CH 7001 Cuira
Tel. +41 81 257 22 28
E-mail Tamara.Kobler@staka.gr.ch  

Procedura da selecziun
La procedura da selecziun per il premi da tut en tut 25 000 euro cuntegna dus pass: En mintgin dals 10 stadis commembers da la ARGE ALP eruescha l'emprim ina giuria regiunala ils 2 megliers projects. Da quests 20 projects tscherna alura ina giuria internaziunala ils 3 premis principals da mintgamai 6000 euro e 7 premis da renconuschientscha da mintgamai 1000 euro. Ils premis vegnan surdads a chaschun da la conferenza dals

schefs da las regenzas da la ARGE ALP il zercladur 2017 tras la parsura actuala da la ARGE ALP, la ministra dal stadi per fatschentas da l'Europa e per relaziuns regiunalas, dr. Beate Merk.

Tut las infurmaziuns pon vegnir consultadas sin www.argealp.org.


En la cuminanza da lavur da las regiuns alpinas (ARGE ALP) collavuran ils suandants stadis federativs e chantuns sco er las provinzas dals quatter pajais Germania, Italia, Austria e Svizra cun ina populaziun totala da ca. 26 milliuns umans: Baviera, Grischun, Lumbardia, Salzburg, Son Gagl, Tessin, Tirol, Tirol dal sid, Trentino e Vorarlberg.


Infurmaziuns:
Tamara Kobler, incumbensada per l'infurmaziun dal chantun Grischun, tel. 081 257 22 28, e-mail Tamara.Kobler@staka.gr.ch  


Gremi: cuminanza da lavur da las regiuns alpinas
Funtauna: rg cuminanza da lavur da las regiuns alpinas