La regenza ha avert la consultaziun tar la revisiun parziala da la lescha per promover la tgira da persunas malsaunas e l'assistenza da persunas attempadas e da persunas che basegnan tgira (lescha per promover la tgira da persunas malsaunas).

Il mars 2016 ha la regenza suttamess al cussegl grond il rapport davart la finanziaziun dals ospitals e da la tgira en il chantun Grischun. En quest rapport ha la regenza examinà detagliadamain la finanziaziun vertenta dals ospitals e da la tgira. Per eliminar las mancanzas constatadas ha ella proponì sis mesiras. Cun questa revisiun parziala da la lescha per promover la tgira da persunas malsaunas duain vegnir realisadas las mesiras ch'il cussegl grond ha approvà en la sessiun da zercladur 2016.

Spustament dals meds finanzials per la tgira ed assistenza
In'ulteriura novaziun datti tar la finanziaziun dal basegn da tgira ed assistenza. Profitar da quai profitan las abitantas ed ils abitants da chasas da persunas attempadas e da tgira che dovran extraordinariamain blera tgira e/u assistenza. La regenza duai vegnir autorisada da renconuscher ulteriurs custs per la tgira ed assistenza da questas persunas. Actualmain èn imputabels mo ils custs che resultan dal giudicament da la situaziun da tgira, ch'è prescrit da la lescha. Quai èn per exempel servetschs persunals sco gidar tar l'igiena dal corp, gidar da sa trair en, gidar da chaminar, gidar da far si chavels e dar medicaments.

Ulteriuras midadas
Ultra da quai ha la regenza l'intenziun da promover dimoras curtas en chasas da persunas attempadas e da tgira per distgargiar las persunas che tgiran ed assistan lur confamigliars. Plinavant duain vegnir remuneradas quellas instituziuns che fan stentas surproporziunalas da scolaziun. Ellas duain survegnir per quai las contribuziuns chantunalas che vegnan reducidas a quellas instituziuns che mettan a disposiziun damain plazzas d'emprendissadi che quellas che vegnan pretendidas da la regenza.

La consultaziun dura fin ils 22 da mars 2017. Ils documents stattan a disposiziun en l'internet sut www.gr.ch / Rumantsch / Consultaziuns currentas.


Infurmaziuns:
President da la regenza dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: regenza
Funtauna: rg chanzlia chantunala