La regenza ha refusà in ulteriur recurs da votaziun en connex cun la votaziun chantunala dal pievel davart la candidatura per ils gieus olimpics dals 12 da favrer 2017. Quest recurs ha crititgà il cumportament da la vischnanca da Scuol che ha fatg ina donaziun da 1000 francs a favur da la campagna da votaziun da las organisaziuns da tetg da l'economia grischuna. Il recurrent ha pretendì che la donaziun vegnia impedida u restituida.

Tenor la pratica dal tribunal federal èn intervenziuns da vischnancas en in cumbat da votaziun chantunal da princip admissiblas mo, sche la vischnanca sco er sias votantas e ses votants han in interess direct e particular vi dal resultat da la votaziun e sche quest interess surpassa per bler l'interess da las ulteriuras vischnancas dal chantun. La vischnanca sto esser pertutgada en moda speziala dal project da votaziun. La vischnanca da Scuol è ina destinaziun da renum naziunal ed internaziunal, che posseda ina infrastructura considerabla per il turissem d'enviern, da stad e da bogns. L'impurtanza dal turissem per l'economia publica da la vischnanca da Scuol e da la regiun è considerabla. Perquai na poi betg vegnir exclus che la vischnanca da Scuol saja pertutgada en moda speziala dal project da votaziun. Ma la dumonda na sto betg vegnir sclerida definitivamain.

La communicaziun a las medias da la "Organisaziun da tetg da l'economia grischuna" dals 23 da schaner 2017 ha tradì ch'igl ha dà donaziuns d'intginas autras vischnancas, er da lieus senza concurrenza. Dapi quella giada n'hai betg pli dà novas publicaziuns en chaussa. Las donaziuns enconuschentas fin ussa dals lieus senza concurrenza èn – tant en il cas singul sco er en vista globala – plitost contribuziuns minimalas. Ins na sto betg partir dal fatg che questas contribuziuns hajan ina influenza relevanta sin il resultat da votaziun. La libertad da votar e d'eleger na para betg d'esser periclitada tras quai.

Tras quai che la vischnanca da Scuol sustegna finanzialmain la campagna da las organisaziuns da tetg da l'economia grischuna, sa participescha ella indirectamain al cumbat da votaziun. Per ch'ina tala participaziun indirecta saja admissibla, ston las vischnancas ademplir tschertas premissas. Perquai è la vischnanca da Scuol vegnida incumbensada da la regenza d'intervegnir tar ils organs da campagna privats e da garantir ch'ils meds publics ch'ella metta a disposiziun vegnian utilisads confurm a l'intent e che l'objectivitad e la discreziun vegnian resguardadas sco pretendì. Senza ina tala pussaivladad da prender influenza n'èn donaziuns da daners a comités privats percunter betg permessas tenor la giurisdicziun.

Sco gia tar las duas emprimas decisiuns da recurs pertutgant las vischnancas d'Arosa e da San Murezzan, duain er en quest cas vegnir infurmadas la publicitad e pia er las vischnancas cun agid d'ina communicaziun a las medias davart la decisiun da la regenza e rendidas attentas a la situaziun giuridica vertenta. Uschia èsi vegnì fatg quai ch'è actualmain necessari per garantir la libertad da votar e d'eleger en la votaziun dals 12 da favrer 2017.


Infurmaziuns:
Chancelier Claudio Riesen, chanzlia chantunala dal Grischun, tel. 081 257 22 23, e-mail Claudio.Riesen@staka.gr.ch


Gremi: regenza
Funtauna: chanzlia chantunala dal Grischun