La regenza ha prendì posiziun davart la realisaziun da l'emprim pachet da mesiras pertutgant la strategia d'energia 2050 da la confederaziun. Plinavant ha ella pretendì in certificat da qualitad extern per las scolas medias grischunas.

La regenza ha beneventà l'emprim pachet da mesiras pertutgant la strategia d'energia 2050
La regenza ha prendì posiziun davart la midada da differentas ordinaziuns areguard la realisaziun da l'emprim pachet da mesiras da la strategia d'energia 2050 da la confederaziun. Questa revisiun d'ordinaziuns dependa dal fatg, sche la nova lescha d'energia vegn acceptada ils 21 da matg 2017.
La regenza ha beneventà che la nova lescha d'energia porscha in'emprima pussaivladad da sustegnair la forza idraulica sco pitga principala da nossa producziun d'electricitad neutrala al clima, sch'i resultan cundiziuns dal martgà difficilas. Ma tenor l'opiniun da la regenza ston dentant suandar a quest emprim pass ulteriurs pass per che la forza idraulica possia ademplir la rolla centrala che la strategia d'energia 2050 attribuescha al provediment d'electricitad svizzer. Per sustegnair la forza idraulica ha la regenza pia proponì da far singulas adattaziuns en ils projects da revisiun. Uschia duai in implant idraulic che vegn remplazzà, valair er lura sco implant nov, sch'i vegn remplazzada almain 70 pertschient da sia substanza. Ultra da quai duain vegnir priorisads projects ch'èn madirs per la construcziun, che vegnan realisads proximamain e che pon pia contribuir a la producziun d'energia regenerabla. La finala duai vegnir prolungada la durada da la bunificaziun da l'indemnisaziun per cuvrir ils custs da la furniziun d'electricitad (ICF) per novas ovras idraulicas pitschnas da 15 a 20 onns. Autramain na pudess la gronda part dals circa 550 projects che sa chattan sin la glista da spetga da la ICF betg pli vegnir realisada. Plinavant ha la regenza sustegnì la posiziun da la conferenza dals directurs chantunals d'energia (CDEn).

posiziun da la conferenza dals directurs chantunals d'energia (CDEn)

Las scolas medias grischunas dovran da nov in certificat da qualitad extern
La regenza ha prendì enconuschientscha dal rapport final da l'uffizi per la furmaziun media-superiura concernent l'examinaziun da la qualitad da scolaziun a las scolas medias 2012–2016.
La finamira è stada quella da sustegnair las scolas ad obtegnair in svilup da qualitad persistent ed a medem temp da pussibilitar al chantun da realisar effectivamain sias incumbensas da surveglianza. Perquai duain la scola chantunala grischuna sco er las scolas medias privatas en il chantun vegnir obligadas da sa procurar in certificat da qualitad extern. Fin la fin da l'onn da scola 2020/21 duain tut las scolas medias grischunas posseder ina certificaziun Q2E. Ils custs per la certificaziun externa sa cumponan da las evaluaziuns IFES che ston vegnir fatgas en il ritmus da 6 onns sco er dals custs annuals per las prestaziuns dals posts da certificaziun. A partir da l'onn 2018 resultan en connex cun las evaluaziuns IFES custs annuals da circa 66 000 francs. Quests custs vegnan surpigliads dal chantun. Ils custs per ils posts da certificaziun ston surpigliar las scolas medias grischunas.

La via da Chapella a S-chanf vegn sanada
Il project per la correcziun da la via da Chapella è vegnì approvà da la regenza cun intginas permissiuns da dretg spezial e cun intginas cundiziuns. La via da Chapella è ina via chantunala da colliaziun che dat access a la fracziun da Chapella che tutga tar la vischnanca da S-chanf. Il project da via cumpiglia essenzialmain la renovaziun da la surstructura da la via ed in schlargiament general da la via a 4,20 meters. Ultra da quai vegn la punt existenta d'atschal e da lain remplazzada cun ina punt da betun che ha ina lunghezza da 12 meters ed ina capacitad da 40 tonnas. Ils custs totals da construcziun importan circa 3 milliuns francs.

A Claustra vegnan pussibilitadas chamonas sin plantas per pernottar
L'engrondiment da la zona da gieu e da temp liber en il territori da Madrisa, concludì da l'anteriura vischnanca da Saas, vegn approvà da la regenza.
La finamira da la revisiun è quella da pussibilitar en il sectur da la staziun da mez da las telefericas Claustra-Madrisa SA 10 simplas chamonas sin plantas che tegnan quint dals basegns da persunas cun impediments e che permettan da pernottar. Quai duai sviluppar vinavant en ina moda raschunaivla la purschida existenta en il pajais d'uffants Madrisa.

© Comet Photoshopping ScRL / Dieter Enz

Laax survegn ina nova basa tecnica forestala cun ina chamona da guaud
La regenza ha approvà il project "basa tecnica forestala e chamona da guaud (local da scolaziun)" da la vischnanca da Laax. Als custs da la basa tecnica forestala vegn empermessa ina contribuziun da maximalmain 884 000 francs e per la construcziun da la chamona da guaud (localitad da scolaziun) garantescha la regenza ina contribuziun unica da pauschalmain 30 000 francs.
Per la basa tecnica forestala èsi previs da construir in edifizi cumbinà cun halla da parcar, lavuratori, local per carburants, local da deposit, biro, local da segiurn e cun indrizs sanitars. Tras la construcziun dal nov edifizi vegni garantì ch'il manaschi forestal po cultivar e tgirar ils guauds, mantegnair las vias da guaud e las ovras da protecziun sco er ademplir ulteriuras incumbensas en moda efficazia. Supplementarmain duai vegnir construida al medem lieu ina chamona da guaud sco local da scolaziun e sco lieu da scuntrada.

© Hoffmann & Durisch
Visualisaziuns da la basa tecnica forestala
Visualisaziuns da la chamona da guaud


Gremi: regenza
Funtauna: rg chanzlia chantunala dal Grischun