La regenza beneventa l'introducziun d'ina carta d'identitad electronica e pretenda che quella vegnia duvrada er en connex cun il e-voting. Plinavant ha ella concedì contribuziuns per il project "velos da muntogna electrifitgads en il Grischun" e per il mantegniment d'averturas dal guaud.

Carta d'identitad eletronica duai pudair vegnir duvrada er per il e-voting
La regenza ha prendì posiziun tar la lescha federala davart ils meds d'identificaziun electronica renconuschids (lescha e-ID). Ella beneventa l'introducziun d'ina carta d'identitad electronica (e-ID) sut reglas dal stadi. La e-ID sco med fidà d'identificaziun u d'autentificaziun duai gidar a liquidar en moda segira affars en l'internet. En il mund fisic èn ils documents d'identitad sco il passaport u la carta d'identitad ils meds per cumprovar en moda fidada l'atgna identitad, en il mund digital dovri la e-ID.
La lescha e-ID è da gronda impurtanza er per il e-voting en connex cun la finamira a lunga vista da la votaziun electronica cumplettamain automatisada (e-voting senza palpiri). Per il e-voting senza palpiri sto l'attest da votar numnadamain vegnir remplazzà tras in med d'autentificaziun tecnic amplifitgà. Igl è pia raschunaivel da trair a niz las pussaivladads da la e-ID er per il e-voting. D'evitar èsi ch'i stoppia vegnir stgaffì in nov sistem e-ID per quest sectur.

Project "velos da muntogna electrifitgads en il Grischun" vegn promovì
Per il project "velos da muntogna electrifitgads en il Grischun" da l'uffizi da construcziun bassa ha la regenza concedì ina contribuziun da 347 000 francs en il rom da la nova politica regiunala (NPR). Las contribuziuns NPR vegnan surpigliadas mintgamai per la mesadad da la confederaziun e dal chantun.
Ils proxims onns chaschuna il svilup rasant dals velos da muntogna electrifitgads (e-mtb) grondas midadas. Quest svilup sto vegnir tratg a niz per il Grischun ord vista dal turissem. Il Grischun sco destinaziun principala per velos da muntogna en il territori alpin ha fitg bunas premissas da surpigliar ina rolla da piunier en il turissem dad e-mtb. En in proceder coordinà vegnan stgaffidas las basas, vegn accelerada la concepziun da las purschidas e vegn tratg a niz il potenzial dals e-mtb per il Grischun. Il project vegn cumenzà il zercladur 2017 e dura 2,5 onns.

©Danuser/FlimsLaaxFalera

Ils carnets da lavur per la scrittira da basa vegnan elavurads da nov
La regenza ha approvà l'elavuraziun dals carnets da lavur per la scrittira da basa en las linguas da scola sursilvan, sutsilvan, puter, vallader, rumantsch grischun e talian. Cun il Plan d'instrucziun 21 vegn introducida l'onn da scola 2018/19 er la scrittira da basa en la scola populara dal Grischun. En il rapport tar la realisaziun dal Plan d'instrucziun 21 Grischun vegni menziunà ch'ils documents necessaris sco ils ordinaturs da basa u ils carnets da lavur adattads als meds d'instrucziun per emprender a leger vegnian a star a disposiziun a temp. Per che quai na valia betg mo per las scolas cun lingua da scola tudestg, vegnan producids carnets da lavur per l'emprima classa dal stgalim primar en las linguas da scola sursilvan, sutsilvan, puter, vallader, rumantsch grischun e talian. Per elavurar ils carnets da lavur vegni fatg quint cun custs da 38 000 francs.

8,9 milliuns francs per il mantegniment d'averturas dal guaud
Per reparar vias d'avertura impunda il chantun quest onn var 8,9 milliuns francs. Tenor la legislaziun forestala sto il guaud vegnir cultivà uschia ch'el po ademplir sias funcziuns en moda persistenta, quai vala en spezial pertutgant la funcziun da protecziun e pertutgant il provediment cun laina. La regenza ha approvà in project collectiv che l'uffizi da guaud e privels da la natira ha elavurà per incumbensa da differentas vischnancas. Cun il project vegnan fatgas en moda decentrala en differentas regiuns dal chantun investiziuns urgentas per mantegnair las averturas necessarias dal guaud. Tut en tut vegnan reparadas vias da guaud e vias da maschinas d'ina lunghezza dad 84 kilometers. Uschia vegn meglierada l'avertura da circa 12 560 hectaras guaud.

 
Vischnanca da Küblis: Suenter ferms urizis il zercladur 2013 è la via da guaud vegnida donnegiada considerablamain. Cun segirar il letg da l'aual e la scarpa sco er cun construir mirs da sustegn è vegnida restabilida la via.

La via da Malögia en Bregaglia vegn protegida meglier cunter in torrent
Il project per la correcziun dal curs d'aua per il rempar da la Val Torta en Bregaglia vegn approvà da la regenza cun intginas cundiziuns e permissiuns spezialas. Il torrent da la Val Torta sbucca tranter Vicosoprano e Borgonovo en la Maira. Directamain sur questa sbuccada traversa la via da Malögia il torrent. A chaschun da las auas grondas dals ultims onns è questa via chantunala vegnida inundada repetidamain e cuvrida cun glera.
Il project da construcziun planisà cuntegna sco element central la construcziun d'in nov indriz per retegnair glera (collectur da glera). Quest collectur duai retegnair in volumen da var 50 000 meters cubic material. Als custs totals da circa 3,9 milliuns francs sa participescha la confederaziun cun ina contribuziun da circa 1,4 milliuns francs per la correcziun dal curs d'aua.

In aual lateral da la Gelgia dastga en pauc temp producir electricitadSeitenbach der Julia darf bald Strom produzieren
La regenza ha approvà la dumonda da concessiun e da project da la Ovra electrica da la citad da Turitg (ewz) dals 8 da schaner 2016 per l'ovra idraulica pitschna Adont. Colliadas cun l'approvaziun èn differentas adattaziuns, cundiziuns e pretensiuns.
La ewz vul trair a niz la forza idraulica dal Adont, in aual lateral da la Gelgia, tranter Riom-Parsonz e Salouf, per producir electricitad. Las radunanzas communalas da las anteriuras vischnancas da Surses han approvà ina concessiun correspundenta dal dretg da las auas gia ils 15 respectivamain ils 22 da december 2015. Tras quai han ellas concedì a la ewz il dretg d'utilisar la forza idraulica dal Adont. L'implant electric duai furnir ina prestaziun installada da var 2990 kilowatt ed ina producziun annuala da 10,5 milliuns uras da kilowatt, quai che correspunda circa a l'electricitad che 1100 chasas d'ina famiglia dovran en in onn. La ewz fa quint cun investiziuns da var 19,9 milliuns francs.

Augment dal pais maximal sin differentas vias chantunalas
Sin sis vias chantunalas vegn il pais maximal fixà da nov suenter la renovaziun da las vias e tenor il conclus da la regenza.
En il district Tavau èn pertutgadas las suandantas vias: Sin la via da Furna Boden poi vegnir charrà da nov cun 32 tonnas empè da 18 tonnas. Sin la via da St. Antönien, traject access Aschüel – Holzbodenbrücke, vala da nov in pais maximal da 32 tonnas empè da 13 tonnas. Sin la via da Stugl, sin il traject Bravuogn – Latsch, poi vegnir charrà da nov cun 32 tonnas empè da 13/18 tonnas, e sin il traject Latsch – Stugl, cun 13 tonnas empè da 7 tonnas. Sin la via da Valzeina, sin il traject via d'Überlandquart – Boden, vala da nov in pais maximal da 28 tonnas empè da 13/18 tonnas, e sin il traject Boden – fin da la via chantunala, da 18 tonnas empè da 13/18 tonnas.
En il district Glion vegn adattà il pais maximal sin las suandantas vias: Sin la via da Pardomat poi vegnir charrà da nov cun 32 tonnas empè da 13/18 tonnas, ed er sin la via da Bellaua vala da nov in pais maximal da 32 tonnas empè da 13 tonnas.


Gremi: regenza
Funtauna: rg chanzlia chantunala dal Grischun