La regenza pretenda che la realisaziun da la AVS restia en la cumpetenza dals chantuns. Plinavant ha ella approvà la revisiun parziala da la planisaziun locala da Zuoz ed ha uschia stgaffì las premissas per realisar il sviament Pro Sur.

La realisaziun da la AVS duai restar en la cumpetenza dals chantuns
La regenza grischuna ha prendì posiziun tar las midadas da la lescha federala davart l'assicuranza per vegls e survivents (LAVS). La confederaziun vuless modernisar la surveglianza da la AVS, da las prestaziuns supplementaras, da l'urden da cumpensaziun dal gudogn e dals supplement da famiglia en l'agricultura.
La regenza è da l'avis che la surveglianza da la 1. pitga possia vegnir modernisada. Tar la realisaziun percunter na dettia nagin basegn d'agir. La regenza refusa cleramain midadas che pudessan tangar la realisaziun che funcziuna bain, senza difficultads e ch'è favuraivla. Il medem vala per las cumpetenzas e per las responsabladads ch'ils chantuns exequeschan gia daditg activamain en quest sectur. In spustament da questas incumbensas dals chantuns a l'administraziun federala cuntrafa a la constituziun ed è tecnicamain privlus. Il sistem executiv da la 1. pitga è sa demussà dapi decennis sco stabil, flexibel, favuraivel e dirigibel. Quai è in cler avantatg economic per la Svizra e per il chantun Grischun. Quai na duai betg sa midar cun l'introducziun d'ina lescha da surveglianza per la 1. pitga.
Plinavant deplorescha la regenza ch'il sboz mettia ina paisa sproporziunadamain gronda sin dumondas operativas da la realisaziun e betg sin ina meglieraziun da la direcziun generala. Allegraivel èsi percunter ch'i duai vegnir introducì in rapport regular davart ristgas dal sistem e davart la direcziun strategica.

Promover vinavant la vendita da muvel
Il nov sistem da pajaments directs da la politica agrara federala 2014 – 2017 surlascha la tratga d'animals cumplettamain a las reglas dal martgà liber, perquai ch'ils pajaments directs che sa refereschan a l'animal crodan davent. Il chantun promova la vendita d'animals da niz cun sustegnair activitads da reclama sco er mesiras per distgargiar il martgà. Cun l'organisaziun e cun la realisaziun dals martgads publics da muvel da maz sco er cun l'incassament e cun il pajament dals retgavs vegn incumbensada la graubündenVIEH SA. Sco indemnisaziun pauschala survegn ella per l'onn current 106 000 francs per quest intent. Per organisar ils martgads publics da muvel da maz vegn pajada per arments ina contribuziun da 40 francs per animal e per nursas e chauras ina contribuziun per animal da 5 francs. Quest sistem che dependa da la prestaziun duai animar la graubündenVIEH SA da vender uschè blers animals sco pussaivel sur il martgà public. Plinavant maina ella in servetsch da transport e da preschentaziun. Quai è ina purschida bainvesida ed effizienta per manaschis che sa chattan plitgunsch en la periferia e che n'han nagina infrastructura adequata. Per promover il martgà da nursas e da chauras vegn concedida sco fin ussa ina contribuziun da preschentaziun dad en media 6 francs per animal commerzialisà. Per nursas che vegnan vendidas e transportadas davent en las vals dal sid vegn pajada supplementarmain ina contribuziun da transport da 4 francs per animal. La finala conceda il chantun ina contribuziun da 90 000 francs per l'amortisaziun dal center da commerzialisaziun da muvel a Cazas. Cun questas mesiras duain vegnir realisadas cundiziuns generalas favuraivlas per la commerzialisaziun da muvel en il Grischun.

Zuoz dastga construir il sviament vest
La regenza ha approvà ina revisiun parziala da la planisaziun locala da la vischnanca da Zuoz. Cun questa revisiun parziala vegnan stgaffidas las premissas per realisar il project "Sviament Pro Sur". Il sviament fa part dal studi "Center dal vitg senza traffic" ed è planisà sco sviament vest dal center dal vitg sco tal da Zuoz. Cun la realisaziun vegn cuntanschida ina buna avertura da l'abitadi da la vart da la spunda ed a medem temp distgargià il center dal vitg dal traffic motorisà.

© Comet Photoshopping ScRL / Dieter Enz

Ils rempars da torrent da la bova a Zizers vegnan sanads
La regenza ha approvà in project per construir rempars en la Dorfrüfe (Chessirüfe) a Zizers cun intginas cundiziuns e permissiuns. La confederaziun ed il chantun sa participeschan a la finanziaziun cun contribuziuns per la correcziun dals curs d'aua. La contribuziun federala importa circa 195 000 francs e la contribuziun chantunala 111 400 francs. Cun il project per la correcziun dal curs d'aua vegn er protegida la via principala H3. Il chantun Grischun sa participescha perquai supplementarmain cun ina contribuziun per la construcziun da vias da 27 850 francs.
La Chessirüfe a Zizers è in torrent activ che passa tras la part sid da Zizers. En quest sectur sa chattan stabiliments da traffic impurtants sco la via naziunala A13, la via chantunala H3 sco er las lingias da las Viafiers federalas e da la Viafier retica. Ils ultims onns han urizis locals donnegià tut en tut 17 rempars da quest torrent. Per pudair garantir la segirezza en cas d'aua gronda er en il futur, ston ils donns dals rempars vegnir reparads. Per part ston vegnir construids novs mirs directivs per lung da las rivas per manar en moda controllada l'aua envers ils rempars. En auters cas basti da construir in fundament per ils rempars existents u da reparar elements dal mir.

Gremi: regenza
Funtauna: rg chanzlia chantunala dal Grischun