Tar il plazzament e tar la tgira da requirentas e requirents d'asil minorens betg accumpagnads (RMBA) occupa il chantun Grischun cun sia pratica ina plazza mesauna en vista naziunala. A questa conclusiun arriva Peter Arbenz en ses rapport davart l'examinaziun da tala.

En il cussegl grond e da la vischnanca da Tavau èn las modalitads da tgira da las requirentas e dals requirents d'asil minorens betg accumpagnads vegnidas crititgadas repetidamain sco insuffizientas. Sinaquai ha il departament da giustia, segirezza e sanadad incumbensà Peter Arbenz, anteriur directur da l'uffizi federal per fugitivs, d'examinar la situaziun e da prender posiziun tar ils puncts crititgads. En questa incumbensa ha el visità ils dus centers da transit Tavau Laret e Trimmis, nua ch'el ha fatg intervistas cun las direcziuns dals centers, cun las collavuraturas ed ils collavuraturs d'assistenza e cun singuls RMBA. Ultra da quai ha el manà discurs cun persunalitads da la politica da la vischnanca da Tavau, cun la cuminanza d'interess per in Tavau avert e cun collavuraturas e collavuraturs da l'administraziun chantunala. Il rapport da Peter Arbenz è ussa avant maun.

Bunas notas per il chantun Grischun
Il rapport dat in attestat positiv al chantun Grischun pertutgant la pratica da plazzament e da tgira da RMBA. Cumpareglià cun ils auters chantuns occupa il Grischun ina plazza mesauna en quai che reguarda ils standards da qualitad. Plinavant constatescha il rapport che la pratica concernent il plazzament e la tgira da RMBA en il chantun Grischun correspundia a la constituziun ed a la legislaziun. Peter Arbenz n'ha er betg pudì constatar mesiras ch'èn vegnidas prendidas illegalmain u cuntravenziuns cunter directivas chantunalas. El menziunescha en il rapport ch'i vegnia lavurà en moda professiunala ed engaschada en ils centers da transit Tavau Laret e Trimmis. Peter Arbenz resguarda la clav da tgira (relaziun da las plazzas da tgira envers il dumber da RMBA) actualmain gist anc sco suffizienta. Sch'il dumber da RMBA che ston vegnir tgirads s'augmenta considerablamain, stuessan vegnir messas a disposiziun resursas supplementaras.

Pussaivladads d'optimaziun èn avant maun
Peter Arbenz ha però er constatà potenzial d'optimaziun. Uschia recumonda el da promover pli savens las collavuraturas ed ils collavuraturs d'assistenza sin champ professiunal. Als RMBA duai l'access ad activitads ed a plazzas da praticum ordaifer ils centers vegnir simplifitgà pli fitg. En il senn da pitschnas meglieraziuns duessan las direcziuns dals centers desister da princip da chastis pecuniars en cas da fauss cumportaments disciplinars da RMBA ed ordinar percunter sancziuns pedagogicamain raschunaivlas. En il center da transit da Tavau Laret duess – sco a Trimmis – vegnir endrizzà ina chaschella da segirezza persunala per mintga RMBA per depositar objects da valur e documents persunals.
Plinavant constatescha il rapport ch'in barat regular sco fin ussa sin plaun operativ saja impurtant, perquai che uschia possian vegnir chattadas cuminaivlamain e svelt soluziuns constructivas en cas da problems che resultan. D'examinar fissi tenor Peter Arbenz d'installar tenor basegn ina conferenza da coordinaziun politic-strategica cun tut las gruppas d'interess da la politica e da la pratica d'asil chantunala.

Il rapport po vegnir clamà si sin la pagina d'internet dal departament da giustia, segirezza e sanadad.


Infurmaziuns:
Cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad