La regenza ha prendì posiziun tar in project da consultaziun da la confederaziun ed ha concedì ina contribuziun per il parc d'urs ad Arosa. Ultra da quai ha ella pussibilità da realisar ina nova senda da viandar tar la chavorgia da Puntcrap.
La regenza pretenda ch'il project federal tar la LPT2 vegnia repassà
La segunda etappa da la revisiun da la lescha federala davart la planisaziun dal territori (LPT2) ch'è vegnida dada en consultaziun da la confederaziun, s'occupa da las prescripziuns davart il construir ordaifer las zonas da construcziun (EOZ). Ord vista da la regenza demussa il project in grond potenzial da meglieraziun.
Tenor il cussegl federal ha il project tranter auter la finamira d'engrondir la libertad d'agir dal chantun en connex cun il construir ordaifer las zonas da construcziun. Quai duai vegnir cuntanschì grazia ad ina disposiziun da la planisaziun sviluppada da nov. La regenza beneventa da princip ch'i pudessan vegnir relaschadas – en il rom da planisaziuns spezialas – prescripziuns adattadas per cuntentar particularitads specificas regiunalas. Cunzunt la realisaziun da l'iniziativa, inoltrada ils 18 d'avrigl 2016, en il chantun Grischun, concernent la liberalisaziun da midar l'intent da stallas, fiss dependenta d'ina tala disposiziun. La moda e maniera co che la confederaziun ha concepì questa disposiziun da planisaziun n'è dentant betg acceptabla. Ella è liada ad in'obligaziun da cumpensaziun cumplitgada, betg empruvada e chara. Da las prescripziuns main severas duain ins – tenor il project – mo pudair far diever, sche auters edifizis vegnan allontanads. La nova libertad d'agir sto la finala vegnir cumprada en moda talmain chara e cumplitgada, che strusch in chantun la po insumma sa prestar. La disposiziun da planisaziun previsa è pia ina soluziun nunadattada che sto vegnir repassada da radent.
Documents da consultaziun DATEC
Contribuziun chantunala per il parc d'urs ad Arosa
A la fundaziun Urs ad Arosa conceda la regenza ina contribuziun da maximalmain 1,2 milliuns francs per il project parc d'urs. Il project cuntegna la construcziun d'ina clasira sin ina surfatscha da circa 2,8 hectaras. En la clasira duain vegnir collocads tschintg urs brins da nauschas tratgas cunzunt da l'Europa dal sidost. L'organisaziun per la protecziun dals animals "Vier Pfoten" vegn ad identifitgar ed a confiscar ils urs ed a manar ils animals la finala ad Arosa. En ina clasira construida tenor ils basegns dals animals duain star a disposiziun als urs in uigl (suttetg per il sien d'enviern) sco er plirs automats da pavel. Las visitadras ed ils visitaders pon profitar d'ina plattafurma, d'in trutg d'urs e d'ulteriuras inscenaziuns.
Grazia al parc d'urs duai vegnir activà spezialmain il turissem da stad ad Arosa e cuntanschì – pervia dals giasts spetgads – in grond niz per l'economia publica. L'implant custa tut en tut circa 6,5 milliuns francs ed ha la prioritad la pli auta per la regiun Plessur sco er per la vischnanca d'Arosa. Il project vegn valità sco infrastructura relevanta per il sistem, che po dar a la destinaziun Arosa impurtants impuls da svilup.
Senda da viandar tar la chavorgia da Puntcrap po vegnir realisada
La regenza ha approvà la revisiun parziala da la planisaziun locala d'Andeer, concludida da la vischnanca ils 29 da mars 2017. Uschia existan ussa las premissas legalas per pudair realisar la colliaziun da la senda da viandar previsa per lung dal Lai da Seara. Quest nov traject da la senda tranter l'ovra idraulica Balamburtg e la chavorgia da Puntcrap duai cumplettar la senda da colliaziun ch'exista actualmain. Perquai ch'il terren al sectur sid dal lai per lung da la via chantunala è per part stip ed intransibel, duai la senda vegnir manada en quest sectur da l'autra vart dal lai sur ina nova punt da peduns. Tras quai vegn per l'ina permess il sguard sin la chavorgia imposanta e per l'autra garantida ina senda separada da la via chantunala ed a medem temp turisticamain attractiva fin a l'ustaria "Rofflaschlucht".
©Uffizi federal da topografia
La riva dal flum a San Murezzan vegn auzada
La regenza ha approvà in project per construir rempars a l'En sur il Lai da San Murezzan. En quest territori ha il flum deficits sin differents trajects pertutgant la protecziun cunter aua gronda e pertutgant l'ecologia. La vischnanca da San Murezzan è perquai sa decidida da cumenzar ils proxims onns quatter etappas d'in project da correcziun dal curs d'aua. Il project d'exposiziun avant maun cuntegna la 2. etappa da la punt Nolda fin a la punt sur la via d'Engiadina. Il chanal da circa 430 meters lunghezza e da 14 meters ladezza va amez tras il center dal territori d'abitadi da San Murezzan Bogn. Il project prevesa tranter auter d'auzar la riva dal chanal per 80 fin 120 centimeters. Quai ha per consequenza che la punt Nolda e la punt chalet Rousette ston vegnir spazzadas. La punt chalet Rousette duai vegnir construida da nov sin in nivel pli aut. Ultra da reparar la protecziun cunter aua gronda permetta il project er da meglierar la situaziun ecologica da las auas.
Tenor la cunvegna da program "ovras da protecziun cunter l'aua" sa participeschan la confederaziun ed il chantun finanzialmain als custs da quest rempar. Dals custs totals da var 2,1 milliuns francs surpiglia la confederaziun maximalmain 726 000 francs ed il chantun maximalmain 415 000 francs.
La punt Nolda sto vegnir spazzada
Pauschalas da talent per scolaras e scolars da l'Academia Engiadina
La regenza ha approvà il program da promoziun da l'Academia Engiadina en il sectur dal sport da la 1. fin a la 6. classa gimnasiala sco er da la 1. fin a la 3. classa da la scola media spezialisada retroactivamain per il 1. d'avust 2016. A scolas medias privatas cun programs da promoziun approvads vegn pajada – applitgond la lescha davart las scolas medias – ina pauschala da talent dad annualmain 1000 francs per scolara u scolar.
Fin ussa vegnivan las pauschalas da talent pajadas mo cun ils labels da qualitad "Swiss olympic sport school" u "Swiss olympic partner school". Dapi il 1. d'avust 2017 vegn dentant er renconuschì il partenadi cun in institut da scola auta en il sectur dal sport. Cun la revisiun parziala da l'ordinaziun davart pajaments da contribuziuns e taxas en ils fatgs da scola media è entrada en vigur in'adattaziun correspundenta.
Sin fundament dal partenadi cun la scola auta federala da sport a Magglingen (SAFSM) ademplescha l'Academia Engiadina ussa las prescripziuns per ina permissiun. Per pudair porscher als talents da sport ina plivalur grazia al partenadi cun la SAFSM, vegn la permissiun concedida sut la cundiziun ch'il partenadi vegnia rinforzà a partir da l'onn da scola 2017/18.
©Academia Engiadina
Nov med d'instrucziun per natira e tecnica per la scola primara grischuna
La regenza ha approvà l'elavuraziun dal med d'instrucziun "NaTech Primarstufe" en ils idioms sursilvan, puter, vallader e sutsilvan sco er en rumantsch grischun ed en talian. En connex cun l'introducziun dal Plan d'instrucziun 21 Grischun exista ina largia da meds d'instrucziun per il rom "Natira, uman e societad" (NUS). Cun il med d'instrucziun "NaTech Primarstufe" po questa largia vegnir serrada almain per part. Il med d'instrucziun cumpiglia tschintg dals nov secturs da cumpetenza dal rom NUS. Cun "NaTech Primarstufe" pon pia en il futur vegnir instruids passa la mesadad dals cuntegns pretendids dal Plan d'instrucziun 21 Grischun en tut las linguas da scola e confurm al plan d'instrucziun. Per l'elavuraziun (senza la producziun) da "NaTech Primarstufe" èn budgetads custs da 650 000 francs.
©Schulverlag plus
Augment da la ladezza maximala permessa sin duas vias a Grüsch
Suenter avair construì da nov e renovà duas vias da colliaziun chantunalas approvescha la regenza l'augment da la ladezza maximala e l'aboliziun dal scumond da charrar cun camiuns cun chars annexs. Per l'ina dastga la via da Valzeina a Grüsch tranter l'access Überlandquart fin Boden vegnir charrada da nov cun ina ladezza maximala da 2,55 meters. Il medem vala per la via d'Überlandquart davent da la punt Pendlatobel fin a Valzalum.
©Uffizi federal da topografia
Gremi: regenza
Funtauna: rg chanzlia chantunala dal Grischun