Las localitads da la firma Caotec a Brusio, ch'èn gist vegnidas renovadas e che vegnan duvradas sco lavuratori, per exposiziuns e sco biro, sco er l'abitaziun integrada adempleschan – sco emprim edifizi da la Svizra – las pretensiuns d'ina certificaziun dubla per ina modernisaziun tenor ils dus standards da construcziun da Minergie-P e da Minergie-A 2017.

Oz surdat il cussegl guvernativ dr. Mario Cavigelli al patrun da construcziun Dario Cao a Brusio ils dus certificats da Minergie-P e da Minergie-A 2017. Il patrun da construcziun demussa il curaschi d'empruvar chaussas novas, en spezial cun cumbinar differents moduls da la tecnica da chasa. Il concept d'energia è vegnì sviluppà e realisà da la firma Fanzun SA da Cuira. La planisadra generala ha transfurmà l'immobiglia, construida l'onn 1971, en in edifizi da mastergn plusenergetic che satisfa en tuts reguards a las pretensiuns da funcziunalitad e da represchentaziun. La tecnologia solara integrada represchenta en moda ideala l'artisanadi d'auta qualitad da la tecnica da chasa dal patrun da construcziun per l'utilisaziun d'energias regenerablas.

Da nov quinta l'entir basegn d'energia
Tras la nova definiziun dals standards da Minergie 2017 vegn resguardà per l'emprima giada tut il consum d'energia d'in edifizi cun l'entir basegn d'electricitad. Uschia sa mida l'edifizi dal consument d'energia en in producent d'energia. Cun in monitoring vegn prendì en mira in manaschi optimal da l'edifizi.

Fatschada e tetg sco implant electric
Collecturs solars integrads en il tetg vegnan duvrads per far aua chauda e per sustegnair il stgaudament. Ils moduls ibrids montads vi da la fatschada produceschan energia termica per il stgaudament e per prestgaudar aua chauda. En cas da basegn utilisescha la pumpa a chalur directamain questa funtauna d'energia. Cur ch'i n'exista nagin basegn direct da chalur, vegn deponida l'energia gudagnada temporarmain en in uschenumnà accumulatur da chalur latenta. Per quest intent è il vegl tanc d'ieli, cun in volumen da 10 meters cubic, vegnì transfurmà en in accumulatur da glatsch. Cun duvrar la chalur latenta ch'è cuntegnida en il tanc e che sa furma tar la midada da fasas dad aua en glatsch, po il basegn da chalur per far aua chauda e per stgaudar vegnir cuvrì durant l'entir onn sur la pumpa a chalur.
Che la chalur resta en chasa è d'attribuir a la nova isolaziun. Ina isolaziun termica d'ina grossezza da fin a 32 centimeters è vegnida messa sin la fatschada oriunda. A l'intern procura ina ventilaziun nuninterruttamain per aria frestga. L'aria consumada vegn tschitschada giu e surdat sia chalur a l'aria frestga entranta.

Autoprovediment grazia ad atgna producziun d'electricitad
Cun ina prestaziun da circa 30 kilowatts peak (kWp) producescha l'implant fotovoltaic ina gronda part da l'electricitad che vegn duvrada per l'edifizi e per ils dus vehichels electrics da l'interpresa. Ils panels solars, che han ina surfatscha da totalmain 200 meters quadrat, furman a medem temp la cuvrida dal tetg da l'edifizi da deposit e remplazzan il tetg plat classic. Uschia vegn augmentada er la valur da l'apparientscha exteriura. Tras l'implant ibrid ch'è integrà en la fatschada e che ha ina prestaziun electrica da circa 10 kilowats vegnan chargiadas las battarias a ions da litium dal tract da l'administraziun. Quest tract funcziuna independentamain da la rait sco implant isolà. Per pudair garantir permanentamain l'independenza da quest tract è vegnida installada ina turbina da vent cun in rotur vertical e cun ina prestaziun nominala da 2 kilowatts.

Project exemplaric
L'exempel da l'edifizi da la firma Caotec mussa che interpresas pitschnas e mesaunas pon far la midada dad energias fossilas ad energias regenerablas grazia a mesiras da spargn tecnicas e grazia ad ina producziun innovativa d'electricitad. Tut quai succeda er anc en moda ecologica, duraivla e favuraivla. Cun agid da questa sanaziun energetica èsi gartegià a las persunas participadas da metter en pe in project exemplaric e da mussar che las novas prescripziuns da Minergie èn realisablas. Questa soluziun è directiva e po vegnir adattada per ulteriuras modernisaziuns.

Fotografias agiuntadas:

 

FOTO 3, 4, 5, 6, 7, 8



Infurmaziuns:
cusseglier guvernativ dr. Mario Cavigelli, schef dal departament da construcziun, traffic e selvicultura dal Grischun, tel. 081 257 36 01, e-Mail Mario.Cavigelli@bvfd.gr.ch


Gremi: departament da construcziun, traffic e selvicultura
Funtauna: rm departament da construcziun, traffic e selvicultura