La regenza ha tschernì las commembras ed ils commembers dal cussegl turistic dal Grischun. Ultra da quai ha ella stgaffì las premissas giuridicas per ina colliaziun dals territoris da skis a Tujetsch.

La regenza ha nominà il cussegl turistic dal Grischun
Per la perioda d'uffizi dal 1. da schaner 2018 fin ils 31 da december 2021 ha la regenza elegì las suandantas persunas sco commembras e commembers dal cussegl turistic dal Grischun:


• prof. dr. Antonia Albani, universitad da Son Gagl (nova)
• Marcus Bernhardt, Europcar International (nov)
• Martin Candrian, Candrian Catering SA (fin ussa)
• Jeannine Pilloud, direcziun dal concern da las Viafiers federalas, manadra dal traffic da persunas (fin ussa)
• Rolf Schafroth, Pecros Management Consulting ScRL (fin ussa)
• Hansjörg Trachsel, anteriur cusseglier guvernativ (fin ussa)
• Alois Zwinggi, managing director dal Forum economic mundial (fin ussa)

D'uffizi èn plinavant participads al cussegl turistic dr. Jon Domenic Parolini, schef dal departament d'economia publica e fatgs socials, e Jürg Schmid, president da Grischun vacanzas. Sco president dal cussegl turistic è puspè vegnì elegì prof. dr. Ernst A. Brugger. Il cussegl turistic era vegnì fundà en il rom dal program da turissem 2014–2021. El cusseglia la regenza ed ils acturs turistics davart temas strategics, cunzunt davart l'ulteriur svilup da las destinaziuns. El dat novs impuls per la cumpetitivitad internaziunala e promova per quest intent il svilup da projects innovativs. El procura per ina perspectiva externa creativa e critica e per in dialog progressiv cun ils acturs turistics. Il cussegl turistic sa raduna per regla trais giadas per onn. El infurmescha regularmain davart sias activitads. Las commembras ed ils commembers èn vegnids elegids per ina perioda d'uffizi da 4 onns.

Agiunta: Purtrets curts dals novs commembers dal cussegl turistic dal Grischun 2018–2021

La planisaziun da la colliaziun dals territoris da skis Mustér – Sedrun avanza
La regenza ha approvà la revisiun parziala da la planisaziun locala da Tujetsch, concludida da la vischnanca ils 21 da matg 2017. Cun questa approvaziun vegnan stgaffidas las premissas da la planisaziun dal territori per la colliaziun dals territoris da skis Mustér – Sedrun planisada. Per la construcziun da la teleferica da colliaziun da Sedrun sin il "Cuolm da Vi" sto la finala anc vegnir fatga la procedura per la permissiun da construcziun.

La colliaziun da territoris da skis duai manar da la staziun da val Salins a la staziun da muntogna Cuolm da Vi
©Uffizi federal da topografia

Damain lecziuns da rumantsch a la scola prima da Trin
La regenza ha approvà la tavla da lecziuns adattada da la scola bilingua da la vischnanca da Trin (scolina e stgalim primar). En divergenza da las tavlas da lecziuns da la "scola populara GR a partir da l'onn da scola 2018/19 per las scolas rumantschas" vegn uschia permessa ina reducziun da las lecziuns da rumantsch per emna da 5 a 4 per la 5. e 6. classa primara. Ultra da quai vegn er approvada definitivamain la regulaziun speziala per l'instrucziun da talian en la 6. classa primara. Fin ussa è la permissiun vegnida dada en il senn d'ina excepziun ch'è sa basada sin ils resultats d'in experiment da scola permess da la regenza, ch'è vegnì fatg durant ils onns da scola 2004/05 fin 2009/10. Tenor questa regulaziun pon las scolaras ed ils scolars da Trin tscherner, sch'ellas ed els vulan frequentar las lecziuns da rumantsch fin a la fin da la 6. classa primara u sch'ellas ed els vulan remplazzar las lecziuns da rumantsch suenter las vacanzas da sport fin a la fin da l'onn da scola tras lecziuns da talian.
Cun quest concept surlavurà ademplescha la vischnanca da Trin l'obligaziun da la regenza d'adattar las tavlas da lecziuns en vista a l'introducziun dal Plan d'instrucziun 21 GR. L'inspecturat da scola ch'è responsabel per la surveglianza sustegna la nova tavla da lecziuns perquai ch'i sa tracta per la scola da Trin d'ina soluziun pragmatica e motivabla, cun la quala po vegnir cuntanschida bain la finamira da promover la bilinguitad.

Differenzas tar la mesiraziun duain vegnir rectifitgadas
La regenza ha deliberà ina contribuziun da circa 40 000 francs per il project da pilot "mesiraziun dal Grischun senza tensiun". La mesiraziun uffiziala en il chantun Grischun è vegnida etablida durant ils ultims var 100 onns e cuntegna tscherts sbagls pervia dals instruments e pervia da las metodas da mesiraziun da quella giada. L'onn 2016 è vegnida remplazzada la rait da puncts fixs tras l'uschenumnà rom da referenza LV95. Uschia han pudì vegnir eliminads per gronda part differenzas e sbagls en la referenza naziunala. Las datas pon ussa anc avair pitschnas differenzas sin plaun local che disturban en il mintgadi. Cun mesiraziuns precisas per satellit duain questas differenzas ussa vegnir rectifitgadas. Uschia duain mesiraziuns pudair vegnir fatgas en moda pli simpla en il futur. Da quai profita en spezial l'economia da construcziun. Ultra da quai survegn la mesiraziun uffiziala ina qualitad anc meglra per segirar la proprietad funsila e per furnir la basa da sistems d'infurmaziun geografica. Il project da pilot "mesiraziun dal Grischun senza tensiun" cumpiglia mesiraziuns da test en trais differentas vischnancas, l'examinaziun dal concept existent da l'uffizi d'agricultura e da geoinfurmaziun (UAG) sco er l'integraziun da las experientschas da l'economia privata.


Gremi: regenza
Funtauna: rg chanzlia chantunala dal Grischun