Sin invit da la regenza ha l'ambassadura austriaca, Ursula Plassnik, visità oz il chantun Grischun.

L'ambassadura ed anteriura ministra da l'exteriur da l'Austria Ursula Plassnik è vegnida beneventada oz en la chasa grischa a Cuira da la presidenta da la regenza Barbara Janom Steiner e dal chancelier Daniel Spadin. L'ambassadura è vegnida accumpagnada dal cusseglier d'ambassada Florian Groder, viceschef da missiun da l'ambassada austriaca, da cusseglier commerzial Manfred Schmid, delegà commerzial dal center austriac d'economia da l'exteriur a Turitg, e dal consul onurari Wolfgang Wunderlich. Suenter il barat dals salids uffizials è in gentar cuminaivel stà sin il program.

La regenza grischuna tgira annualmain contacts cun represchentantas e represchentants da stadis esters en Svizra. Quests discurs èn elements impurtants da las relaziuns externas dal chantun. Cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas specificas actualas. Autras visitas servan en emprima lingia a barattar experientschas sin il champ cultural, economic e politic.

Fotografia agiuntada:

Da sanestra: cusseglier commerzial Manfred Schmid, cusseglier d'ambassada Florian Groder, ambassadura Ursula Plassnik, presidenta da la regenza Barbara Janom Steiner, chancelier Daniel Spadin e consul onurari Wolfgang Wunderlich.


Gremi: regenza
Funtauna: rg chanzlia chantunala dal Grischun