La cumissiun per politica da stadi e strategia propona al cussegl grond d'acceptar la revisiun parziala da la lescha davart ils dretgs politics. Il cussegl grond vegn a tractar quest project en la sessiun da favrer 2018.

La cumissiun per politica da stadi e strategia dal cussegl grond ha predeliberà la missiva da la regenza concernent la revisiun parziala da la lescha davart ils dretgs politics en il chantun Grischun. Quai sut il timun dal president da la cumissiun Tarzisius Caviezel (Tavau Clavadel) ed en preschientscha dal president da la regenza Mario Cavigelli.

E-voting en il senn da la democrazia digitala
L'opiniun politica vegn furmada pli e pli tras l'internet (medias digitalas e socialas). Las votaziuns ed elecziuns sin via electronica (uschenumnà e-voting) èn tant per la regenza sco er per la cumissiun ina resposta a la dumonda, co ch'il stadi po garantir la participaziun politica da sias burgaisas e da ses burgais en ina democrazia digitala. La participaziun a noss sistem democratic sto restar attractiva e simpla er en l'avegnir. Il e-voting cumplettescha las pussaivladads da votar e d'eleger existentas e convenziunalas. Il chantun Grischun ha fatg gia ils onns 2010 fin 2015 – en il rom d'in consorzi da nov chantuns – cun success tests cun e-voting cun sias Svizras e ses Svizzers a l'exteriur.

Midada da lescha per cumplettar il dretg federal
Tras questa revisiun parziala da la lescha davart ils dretgs politics en il chantun Grischun duain sco emprim vegnir stgaffidas las basas giuridicas chantunalas necessarias per pudair introducir il e-voting sco terz chanal da votaziun ordinari sin tut ils plauns statals. En in segund pass, probablamain l'onn 2018, duai vegnir acquistà in sistem dad e-voting. En in terz pass vegnan l'emprim definidas vischnancas da pilot e la finala introducì il e-voting sin l'entir territori chantunal.

La cumissiun beneventa unanimamain l'introducziun
En la debatta d'entrar en materia ha la cumissiun approvà unanimamain l'introducziun dad e-voting en il Grischun, uschia sco ch'ella è vegnida proponida da la regenza. En quest connex ston ils aspects da segirezza obtegnair la prioritad absoluta. Per la cumissiun èsi d'ina impurtanza centrala ch'er l'autonomia da las vischnancas vegnia resguardada: Las vischnancas duain pudair decider autonomamain, sche ed en tge dimensiun ch'ellas vulan introducir il e-voting (cun u senza votaziuns communalas). En il rom da la tractativa detagliada ha la cumissiun discutà intensivamain la procedura d'annunzia (procedura per inoltrar glistas) da candidatas e candidats per elecziuns d'autoritads sin plaun chantunal u regiunal en la procedura da maiorz a l'urna. La cumissiun ha desistì da far propostas d'annullaziun e da midada ed ha acceptà la finala senza opposiziun il sboz da la regenza. Memia curts èn resultads – tenor l'opiniun unanima da la cumissiun – ils termins tar segunds scrutinis. Ella propona perquai al cussegl grond da prolungar adequatamain quests termins. Dal rest ha la cumissiun acceptà las propostas da la regenza.

La cumissiun propona al cussegl grond d'acceptar la revisiun parziala da la lescha davart ils dretgs politics en il chantun Grischun.


Infurmaziuns:
Tarzisius Caviezel (Tavau Clavadel), president da la cumissiun per politica da stadi e strategia, tel. 079 610 23 70


Gremi: cumissiun per politica da stadi e strategia
Funtauna: rg cumissiun per politica da stadi e strategia