En ses quint annual 2017 cuntanscha il chantun Grischun in surpli dal retgav operativ extraordinariamain aut da 78 milliuns francs. Retgavs d'ina autezza surprendenta e per gronda part unica resultan tar las taglias chantunalas, tar la part chantunala da la taglia anticipada e dal gudogn da la banca naziunala, tras la vendita d'aczias sco er tras la dissoluziun da retenziuns betg duvradas e tras rectificaziuns da valurs d'emprests. Attribuì al bun resultat han er clusiuns favuraivlas dals preventivs globals tar ils uffizis e contribuziuns a terzas persunas, che n'èn betg vegnidas retratgas. Ina valur da record han percunter cuntanschì las investiziuns nettas cun in volumen da 221 milliuns francs.

Ils parameters e las caracteristicas 2017 (onn precedent):

• resultat operativ 78,0 milliuns (16,4 miu.)
• resultat total 128,8 milliuns (-51,5 miu.)
• entradas fiscalas 775,2 milliuns (751,8 miu.)
• investiziuns nettas 221,4 milliuns (207,2 miu.)
• quota statala 14,0 % (13,9 %)
• grad d'atgna finanziaziun 110,6 % (88,4 %)

Meglras clusiuns dals preventivs globals, contribuziuns pli bassas e retgavs supplementars
Partind d'expensas totalas e d'in retgav total da mintgamai circa 2,4 milliardas sa chattan las divergenzas dal quint envers il preventiv en il rom dals onns precedents. Quai cun -2,9 pertschient tar ils custs da manaschi e cun +0,7 pertschient tar il retgav da manaschi. Da la vart dals custs n'èn ils credits tenor preventiv, ch'eran vegnids approvads, betg vegnids duvrads cumplainamain – quai er en consequenza d'ina gestiun precauta da las finanzas. Ils preventivs globals dals posts da servetsch èn per part vegnids sutpassads cleramain. Tar ils credits singuls n'èn las contribuziuns dal chantun a communitads ed a terzas persunas betg vegnidas retratgas en l'autezza planisada en il quint economic ed en il quint d'investiziun. En spezial las contribuziuns d'investiziun dependan directamain dal progress da realisaziun dals singuls projects cofinanziads e na stattan betg sut l'influenza dal chantun. Malgrà ils sutpassaments dals preventivs cuntinuescha dentant la tendenza che las expensas totalas creschan.

Da la vart dals retgavs è il fitg bun resultat operativ d'attribuir principalmain a las suandantas posiziuns (cumparegliaziun cun il preventiv / cun l'onn precedent):

• taglias chantunalas pli autas (+15,5 miu. / +22,7 miu.)
• gudogns realisads sin investiziuns finanzialas (+17,5 miu. / +17,1 miu.)
• distribuziun supplementara da la banca naziunala svizra (+11,4 miu. / +11,4 miu.)
• part chantunala pli auta da la taglia anticipada (+9,5 miu. / +10,6 miu.)
• pajaments pli auts or da la gulivaziun da finanzas federala NGF (0 / +9,8 miu.)

Quests retgavs supplementars resp. spezials èn per part unics e crodan davent ils proxims onns. Tar las taglias chantunalas èn las taglias directas da las persunas natiralas (taglias sin las entradas, taglias sin la facultad e taglias a la funtauna sco er taglias sin las expensas da persunas estras) creschidas pli fitg che spetgà cumpareglià cun l'onn precedent (+22,4 miu.) e cumpareglià cun il preventiv (+8,7 miu. / +1,6 %). Las taglias directas da las persunas giuridicas (taglias sin il gudogn e sin il chapital) èn dentant restadas sut las cifras da l'onn precedent (-4,8 miu.). Cun 88,1 milliuns n'han ils retgavs per pauc betg cuntanschì il preventiv (-0,6 miu. / -0,6 %).

La finanziaziun speziala "vias" mussa l'onn 2017 in quint equilibrà. Budgetà era in deficit da 20 milliuns. Il dabun da las vias resta sin il maximum legal da 100 milliuns.

Bun resultat extraordinari grazia a gudogns da contabilitad sin investiziuns finanzialas
Augments dals curs tar las investiziuns finanzialas han purtà retgavs extraordinaris relativamain gronds. Augments da la valur da totalmain 44,5 milliuns hai dà sin ils certificats da participaziun da la banca chantunala grischuna (BCG), sin las aczias da la Repower SA e da la Ems-Chemie Holding SA sco er sin las vaglias en ils mandats per l'administraziun da la facultad.

Il surpli dal retgav augmenta l'agen chapital
Il resultat total sco summa dal resultat operativ e dal resultat extraordinari importa 128,8 milliuns. L'agen chapital cumprovà importa 2,4 milliardas suenter la cudeschaziun dal gudogn. Da quai èn passa 1,6 milliardas liadas en l'infrastructura necessaria per il manaschi (facultad administrativa), en investiziuns finanzialas sco er en finanziaziuns spezialas ed en prefinanziaziuns. L'agen chapital libramain disponibel per cuvrir deficits importa 453,5 milliuns. Ensemen cun ils meds reservads per finanziaziuns spezialas e per prefinanziaziuns (329,4 miu.) importa l'agen chapital disponibel tut en tut 782,9 milliuns.

Autas investiziuns nettas
L'augment temporar da las expensas d'investiziun, ch'è planisà en il program da la regenza 2017–2020, ha cumenzà. Las investiziuns nettas han cuntanschì l'onn 2017 ina valur da 221,4 milliuns ed han surpassà per 14,3 milliuns la valur da l'onn passà. Las expensas bruttas planisadas ordvart autas da 437,6 milliuns èn dentant vegnidas sutpassadas cleramain cun 368,1 milliuns. Per ils projects currents da la construcziun auta e bassa sco er per ulteriuras investiziuns materialas èn resultadas expensas da totalmain 186,0 milliuns (preventiv -19,6 miu.; onn precedent +30,7 miu.). Sut las valurs planisadas èn er restadas las atgnas contribuziuns d'investiziun (-27,9 miu.) ed ils emprests (-11,1 miu.). Il motiv è savens quel che las premissas per pajar ina contribuziun u per conceder in emprest n'è betg anc ademplidas a la fin da l'onn.

Perspectiva 2018
Il bun quint annual 2017 rinforza il fundament da las finanzas chantunalas grischunas e l'abilitad d'agir dal chantun. Per l'onn current dastga vegnir quintà cun in resultat operativ gulivà. Grazia a la distribuziun dubla da la banca naziunala ed a dividendas pli autas (BCG, Ems-Chemie Holding SA) èn gia enconuschentas meglieraziuns substanzialas dal retgav cumpareglià cun il preventiv. In pau meglras èn er daventadas las perspectivas per ils onns dal plan da finanzas. Cun agid d'ina politica da finanzas er vinavant restrictiva e cun in'auta disciplina d'expensas duessi esser pussaivel d'observar ils onns 2019 e 2020 las valurs directivas prescrittas dal cussegl grond. Intschert è il svilup a partir da l'onn 2021. Quel dependa fermamain da la realisaziun dal project fiscal 17 (PF17) e da la gulivaziun da finanzas federala (NGF).

Il cussegl grond vegn a tractar il quint annual 2017 en la sessiun da zercladur 2018.

Agiuntas:
Agiunta a la communicaziun a las medias: Bilantscha
Agiunta a la communicaziun a las medias: Quint economic
Agiunta a la communicaziun a las medias: Quint d'investiziun

Ulteriuras infurmaziuns: departament da finanzas e vischnancas


Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, e-mail Barbara.Janom@dfg.gr.ch


Gremi: departament da finanzas e vischnancas
Funtauna: rg departament da finanzas e vischnancas