Dapi l'onn 2014 èn reglads ils pajaments directs en il sectur da las surfatschas per la promoziun da la biodiversitad e da l'entretschament en l'ordinaziun davart ils pajaments directs. Pervia da quai vegn l'execuziun en quest sectur surdà da nov a l'uffizi d'agricultura e da geoinfurmaziun (UAG) ch'è er cumpetent per tut ils auters pajaments directs. Fin ussa era l'uffizi per la natira e l'ambient (UNA) cumpetent en chaussa.

En il chantun Grischun survegnan manaschis agriculs cun dretg da pajaments directs mintga onn pajaments directs da circa 29 milliuns francs per surfatschas per la promoziun da la biodiversitad dal stgalim da qualitad 2 e per lur entretschament. Talas surfatschas da promoziun èn per exempel prads duvrads en moda extensiva u en moda pauc intensiva, surfatschas da sternim, guauds da pasculaziun u saivs vivas. Tenor la lescha federala davart la protecziun da la natira e da la patria (LPNP) vegnan pajads supplementarmain circa 0,5 milliuns francs contribuziuns LPNP per la cultivaziun cunvegnenta da biotops. Ils var 2000 contracts da cultivaziun ch'èn necessaris per quai èn vegnids administrads fin ussa dal UNA. Tut ils auters pajaments directs fan gia ussa part da la responsabladad dal UAG.

Plivalur per la pratica
Cun excepziun da las contribuziuns LPNP èn reglads dapi l'onn 2014 tut ils pajaments directs en l'ordinaziun davart ils pajaments directs a l'agricultura (ordinaziun davart ils pajaments directs, OPD). Pervia da las experientschas da – en il fratemp – 3 onns cun l'execuziun da la nova OPD èn ils dus uffizis ch'èn incumbensads cun ils pajaments sa vesids obligads d'examinar e d'optimar las proceduras d'execuziun. La nova repartiziun da las incumbensas suonda il princip, tenor il qual l'execuziun da las prescripziuns davart la promoziun da la biodiversitad en la OPD è ina incumbensa communabla da l'agricultura e da la protecziun da la natira, tar la quala il UAG ha la responsabladad ed il UNA fa part en sia funcziun sco post chantunal spezialisà. A partir da l'onn 2019 è pia il UAG responsabel per l'execuziun cumplaina da la OPD, quai vul dir inclusiv las contribuziuns per la biodiversitad e per l'entretschament ed inclusiv ils contracts da cultivaziun per quai.

Trair meglier a niz sinergias
Il UNA è vinavant responsabel per las contribuziuns LPNP e surveglia cuminaivlamain cun il UAG – en il rom da proceduras definidas – la garanzia da qualitad en il sectur da las surfatschas per la promoziun da la biodiversitad dal stgalim da qualitad 2 e per l'entretschament. Cun questa nova repartiziun da las incumbensas che vegn realisada pass per pass fin la fin da l'onn 2018 vegnan detretschads las incumbensas ed ils secturs da responsabladad, simplifitgads puncts da contact e tratgas a niz sinergias.


Infurmaziuns:
Daniel Buschauer, manader da l'uffizi d'agricultura e da geoinfurmaziun, tel. 081 257 24 31, e-mail Daniel.Buschauer@alg.gr.ch


Gremi: uffizi d'agricultura e da geoinfurmaziun
Funtauna: rg uffizi d'agricultura e da geoinfurmaziun