La cumissiun per furmaziun e cultura dal cussegl grond ha predeliberà per mauns dal cussegl grond las missivas da la regenza tar las iniziativas chantunalas dal pievel "Buna scola grischuna – cundecisiun en dumondas impurtantas da la furmaziun" e "Buna scola grischuna – cundecisiun tar ils plans d'instrucziun". Ella è entrada unanimamain sin il project e recumonda al cussegl grond – cun ina cuntravusch – da recumandar al pievel da refusar l'iniziativa.

La cumissiun per furmaziun e cultura dal cussegl grond ha predeliberà, sut il presidi da la presidenta da la cumissiun Cornelia Märchy-Caduff, las missivas da la regenza tar las iniziativas chantunalas dal pievel "Buna scola grischuna – cundecisiun en dumondas impurtantas da la furmaziun" e "Buna scola grischuna – cundecisiun tar ils plans d'instrucziun". A la sesida èn er sa participads il cusseglier guvernativ Martin Jäger, sia secretaria dal departament sco er represchentantas e represchentants da l'uffizi per la scola populara ed il sport. Ultra da quai ha la cumissiun dà l'occasiun ad ina delegaziun dal comité d'iniziativa da declerar al cumenzament da la sesida a bucca ses intents davant la cumissiun.

La maioritad recumonda da refusar l'iniziativa
Suenter ina discussiun intensiva dal cuntegn è la cumissiun entrada unanimamain sin ils projects ed ha deliberà tuttas duas iniziativas per mauns dal cussegl grond. En quest connex è la maioritad da la cumissiun – cun ina cuntravusch – suandada la proposta da la regenza e recumonda da refusar l'iniziativa. Tant l'iniziativa constituziunala (cundecisiun en dumondas impurtantas da la furmaziun) sco er l'iniziativa legislativa (cundecisiun tar ils plans d'instrucziun) avessan per consequenza che las cumpetenzas vegnissan spustadas da la regenza al cussegl grond (e la finala a las votantas ed als votants grischuns). Quai resguarda la gronda maioritad da la cumissiun sco fauss per fatgs classicamain operativs (sco p.ex. plans d'instrucziun). Or da l'optica dal dretg public è la legislaziun – e betg la realisaziun da quella – attribuida al cussegl grond sco organ strategic. Ultra da quai ha la cumissiun exprimì resalvas areguard la praticabilitad, sch'ina cumissiun dal cussegl grond e pli tard l'entir cussegl grond stuess tractar e deliberar in plan d'instrucziun da pliras tschient paginas, che regla detagls dal plaun operativ il pli bass.

Nagina cuntraproposta da la cumissiun
En sia missiva al cussegl grond n'ha la regenza betg prendì en consideraziun ina cuntraproposta. Il ravugl da la cumissiun n'ha medemamain betg proponì ina cuntraproposta.

Il cussegl grond vegn a tractar las duas iniziativas en la sessiun d'avust 2018.


Infurmaziuns:
presidenta da la cumissiun Cornelia Märchy-Caduff, tel. 079 440 44 57


Gremi: cumissiun per furmaziun e cultura
Funtauna : rg cumissiun per furmaziun e cultura / Secretariat dal cussegl grond