En il rom d'ina procedura da submissiun ha la regenza dà a la Posta svizra SA l'agiudicaziun per in nov sistem dad e-voting per il chantun Grischun.

Cun la revisiun parziala da la lescha davart ils dretgs politics aveva il cussegl grond stgaffì ils 12 da favrer 2018 la basa legala ch'è necessaria per introducir il e-voting. Sin quai ha la chanzlia chantunala instradà l'acquisiziun publica d'in sistem dad e-voting. Il rapport d'evaluaziun da la chanzlia chantunala mussa che la purschida da la Posta svizra SA ademplescha cumplainamain las pretensiuns formuladas.

Votaziun electronica a partir dal 2020
L'introducziun e la derasaziun dal e-voting en il chantun Grischun èn planisadas en etappas. Per l'onn 2020 è previsa ina fasa da pilot cun probablamain sis vischnancas ed a partir da l'onn 2021 è planisada l'extensiun cuntinuanta sin ulteriuras vischnancas interessadas. Quant svelt che la derasaziun po vegnir realisada en la pratica dependa essenzialmain da las vischnancas. Quellas pon decider autonomamain, sch'ellas vulan introducir il e-voting ed en tge dimensiun che quai duai succeder. Plinavant dependa il process er da la dumonda, quantas votantas e quants votants che s'annunzian alura effectivamain per il e-voting en questas vischnancas.

E-voting en il chantun Grischun
Cun sias Svizras e cun ses Svizzers a l'exteriur aveva il chantun Grischun gia fatg cun success tests cun il e-voting en il rom d'in uschenumnà consorzi, e quai per 18 votaziuns e per las elecziuns dal cussegl naziunal e dal cussegl dals chantuns l'onn 2011. Per la fin da l'onn 2015 han ils chantuns participads schlià il consorzi. Actualmain poi vegnir votà per e-voting en nov chantuns (per part mo da las Svizras e dals Svizzers a l'exteriur). Applitgads vegnan en quest connex ils sistems da la Posta svizra SA e dal chantun Genevra.


Infurmaziuns:
Daniel Spadin, chancelier, tel. 081 257 22 21, e-mail Daniel.Spadin@staka.gr.ch


Gremi: regenza
Funtauna: rg chanzlia chantunala