La regenza ha prendì posiziun davart la cuntraproposta indirecta da la confederaziun a l'iniziativa dal pievel "Gea al scumond da cuvrir la fatscha". Ultra da quai ha ella dà glisch verda per ina nova purschida da velo da muntogna a Ftan e per in project da via en la Viamala.
La regenza è cunter in scumond general da cuvrir la fatscha
La regenza ha prendì posiziun davart il sboz preliminar tar la lescha federala davart il scumond da cuvrir la fatscha. Il project da consultaziun dal departament federal da giustia e polizia è ina cuntraproposta indirecta a l'iniziativa dal pievel "Gea al scumond da cuvrir la fatscha". El cuntegna l'obligaziun da scuvrir la fatscha davant tschertas autoritads. Ultra da quai è previsa explicitamain ina sancziun penala, sch'i vegn sfurzà da cuvrir la fatscha.
La regenza beneventa il project, perquai ch'il cussegl federal vul introducir cun quel mesiras sistematicas empè d'in scumond general da cuvrir la fatscha. Per l'ina observa il cussegl federal uschia l'autonomia dals chantuns, als quals cumpeta gia oz d'introducir scumonds da cuvrir la fatscha. Il chantun Grischun n'ha fin ussa betg fatg diever da questa pussaivladad. Il cussegl grond ha dentant refusà pir dacurt, en la sessiun d'avust 2018, d'acceptar in scumond da cuvrir la fatscha per occurrenzas publicas che dovran ina permissiun. Per l'autra regla la cuntraproposta indirecta situaziuns, en las qualas l'identitad n'è betg vesaivla a terzas persunas perquai che la fatscha è cuvrida. Quai difficultescha u impussibilitescha d'ademplir incumbensas statalas. L'obligaziun da scuvrir a curta vista la fatscha è ord vista da la regenza grischuna ina mesira necessaria per garantir che las incumbensas statalas possian vegnir ademplidas.
Consultaziuns dal departament federal da giustia e polizia
Purschida da velo da muntogna a Ftan po vegnir engrondida
La regenza ha approvà la revisiun parziala da la planisaziun locala, concludida da la vischnanca da Scuol ils 21 da matg 2017. Per promover la purschida da velo da muntogna en la destinaziun da vacanzas Engiadina Scuol po vegnir construì in center da vias da velo da muntogna en la fracziun da Ftan. Quel sa cumpona d'in parc d'abilitads d'ina grondezza da circa 8 ha en il guaud sur l'Institut autalpin sco er da rutas da velo da muntogna affluentas. Il parc d'abilitads planisà duai consister da vias da velo da muntogna che cuntegnan differents elements d'exercizi e differents obstachels. Davent da las telefericas da las Pendicularas Motta Naluns Scuol-Ftan-Sent mainan rutas da velo da muntogna tar il parc d'abilitads planisà. La purschida da velo da muntogna ch'exista en la regiun duai vegnir rinforzada cun questa purschida attractiva.
©Comet Photoshopping ScRL/ Dieter Enz
Via principala tras la Viamala vegn renovada
La regenza ha approvà in project d'exposiziun per curreger la via taliana en il traject Viamala. Quest traject da via na correspunda betg pli als basegns actuals ed a las pretensiuns da segirezza actualas envers ina via principala. Il project prevesa da renovar la surstructura da la via ch'è en in fitg nausch stadi sco er da reparar en moda cumplessiva las construcziuns artifizialas, las punts, las gallarias ed ils mirs da protecziun. Las lavurs da construcziun duain vegnir realisadas en quatter etappas annualas da l'onn 2019 fin l'onn 2022. Ils custs totals dal project importan circa 12,8 milliuns francs.
Protecziun cunter lavinas sin il Munt da la Bês-cha sto vegnir renovada
Sin il Munt da la Bês-cha sur Puntraschigna èn vegnidas construidas en pliras etappas durant l'ultim tschientaner ovras da protecziun cunter lavinas e cunter crudada da crappa. L'uffizi da guaud e privels da la natira ha constatà, a chaschun da sia controlla periodica, che l'entir sistem da protecziun che consista da mirs sitgs, d'ovras d'atschal e da betun sco er da rempars, ha subì donns pervia da l'aura e pervia da process da privels da la natira. Il project "Protecziun cunter lavinas e cunter crudada da crappa Munt da la Bês-cha" duai permetter da restabilir l'effect da protecziun dals rempars. La regenza ha approvà la 3. etappa dal project da la vischnanca da Puntraschigna ed ha garantì ina contribuziun chantunala da circa 1,7 milliuns francs.
Contribuziuns per la pli gronda occurrenza da sport da scola e per ils centers da prestaziun grischuns
Il chantun Grischun paja pliras contribuziuns or da la finanziaziun speziala sport. Per l'ina conceda la regenza ina contribuziun a favur da la pli gronda occurrenza da sport da scola da la Svizra e per l'autra a favur dals centers regiunals e naziunals da prestaziun en il chantun Grischun.
Per realisar il di svizzer da sport l'onn 2020 a Cuira e conturns conceda la regenza maximalmain 100 000 francs, al qual sa participeschan tut en tut 3000 scolaras e scolars dal stgalim secundar I. En eliminaziuns chantunalas pertutgant 12 differentas disciplinas èn ellas ed els sa qualifitgads per quest di.
Medemamain or da la finanziaziun speziala sport sustegna la regenza ils centers regiunals e naziunals da prestaziun che han lur sedia e ch'exequeschan lur activitad principala en il chantun Grischun. Ultra da quai ston ils centers da prestaziun pudair preschentar in concept da juniors da la federaziun naziunala ed ina disposiziun valaivla da l'uffizi federal da sport. Uschia conceda la regenza tut en tut a 35 centers da prestaziun contribuziuns d'ina summa da circa 638 000 francs.
Gremi: regenza
Funtauna: rg chanzlia chantunala dal Grischun