Sin ils attests da salari emess da l'uffizi da persunal èn las indemnisaziuns dal temp da viadi da las commembras e dals commembers dal cussegl grond vegnidas registradas sco spesas e betg vegnidas decleradas sco salari. Uschia resultan correcturas areguard il dretg fiscal ed il dretg da l'assicuranza sociala.

La controlla chantunala da finanzas ha constatà ch'i èn – dapi l'introducziun da l'indemnisaziun dal temp da viadi l'onn 2003 – vegnidas decleradas sin ils attests da salari da las commembras e dals commembers dal cussegl grond mintgamai entradas memia bassas suttamessas a la taglia resp. entradas decisivas memia bassas sin ils rendaquints cun l'institut d'assicuranza sociala. Sin ils attests da salari n'è l'indemnisaziun dal temp da viadi betg vegnida inditgada sco salari, uschia che questa indemnisaziun n'è vegnida resguardada ni per il rendaquint da la AVS ni per la taxaziun da taglia. Quai sto ussa vegnir curregì, er sche la pajataglia u il pajataglia n'è – sco en il cas qua avant maun – betg la culpa.

Pervia da questa correctura tenor il dretg fiscal resulta ina procedura da taglia supplementara per ils ultims 10 onns. La correctura tenor il dretg da l'assicuranza sociala vegn fatga tras ina pretensiun posteriura per ils ultims 5 onns respectivamain per ils onns 2013–2017. Las indemnisaziuns dal temp da viadi importan per tut las commembras e tut ils commembers dal cussegl grond totalmain 150 000 francs per onn; las contribuziuns correspundentas a las assicuranzas socialas, che vegnan ussa pretendidas posteriuramain, muntan a var 19 000 francs per onn. Da la procedura da taglia supplementara èn pertutgadas var 300 persunas.
Sin l'attest da salari 2018 da las commembras e dals commembers dal cussegl grond vegn l'uffizi da persunal ad inditgar correctamain l'indemnisaziun dal temp da viadi. Per stgaffir clerezza e segirezza giuridica per l'avegnir duai l'urden da gestiun dal cussegl grond vegnir adattà en questa sessiun da december.


Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, tel. 081 257 32 01, Barbara.Janom@dfg.gr.ch


Gremi: departament da finanzas e vischnancas
Funtauna: rg departament da finanzas e vischnancas