Ina represchentanza dal chantun è sa scuntrada a Scuol per ina discussiun cun las autoritads da la regiun Engiadina bassa / Val Müstair. Suenter che la cumissiun da concurrenza (CUMCO) aveva scuvrì cunvegnas da submissiun, èn vegnidas barattadas las experientschas davart las mesiras giuridicas dals patruns da construcziun sco er davart l'impurtanza da las incaricas publicas per la regiun.

Ina delegaziun chantunala sut la direcziun dal cusseglier guvernativ Mario Cavigelli, schef dal departament da construcziun, traffic e selvicultura dal Grischun, ha discutà ier a Scuol cun ina represchentanza da las autoritads da la regiun Engiadina bassa / Val Müstair. En il center dals discurs èn stadas las mesiras dal maun public envers interpresas ch'èn sa participadas a cunvegnas da submissiun anticoncurrenzialas.

Cunvegnas da submissiun anticoncurrenzialas – recurs davant il tribunal administrativ federal
La CUMCO ha scuvrì cunvegnas da concurrenza inadmissiblas ed ha terminà pli tard otg proceduras cun sancziuns cunter interpresas falliblas ("Val Müstair", "Engiadina I", "Engiadina III – VIII"). Sco ultim, en il cas "Engiadina I", ha la CUMCO chastià ils 26 da mars 2018 differentas interpresas da construcziun localas cun passa 7,5 milliuns francs. Ils recurs inoltrads cunter questa decisiun èn actualmain pendents tar il tribunal administrativ federal a Son Gagl.

Restabiliment da la concurrenza – defensiun dals dretgs dal chantun e da la regiun
Il chantun e la regiun han prendì mesiras per defender ils interess dal maun public. Per segirar eventuals dretgs d'indemnisaziun èn vegnidas inoltradas a la CUMCO dumondas da pudair prender invista da las actas, e las interpresas pertutgadas èn vegnidas supplitgadas da declerar lur renunzia a l'objecziun da surannaziun. Plinavant ha il chantun pronunzià sancziuns tenor il dretg d'acquisiziuns per garantir che la concurrenza funcziunia. Cunter in'exclusiun da surdadas dal chantun, ch'il chantun ha disponì l'onn 2018, fa ina interpresa actualmain recurs tar la dretgira administrativa dal Grischun. Plinavant sa procura il chantun – sco premissa d'admissiun – ina conferma supplementara avant mintga surdada d'ina incarica ad ina interpresa involvida. En questa conferma sto l'interpresa inditgar d'ina vart sias activitads da cunvegnas en connex cun surdadas dal chantun. Da l'autra vart sto ella dar infurmaziuns davart il stadi da las proceduras da la CUMCO che pertutgan ella sezza. Ultra da quai ston las interpresas da construcziun che inoltreschan offertas confermar expressivamain da betg pli avair fatg cunvegnas da concurrenza dapi il cumenzament da las investigaziuns da la CUMCO l'october 2012.

Incaricas dal maun public – impurtanza en las regiuns perifericas
En ina regiun periferica sco l'Engiadina bassa e la Val Müstair han incaricas dal maun public ina gronda impurtanza per l'economia publica. Il chantun e la regiun èn tuts dus da l'avis che l'economia da construcziun stoppia far sforzs considerabels per restabilir la confidenza. Quai è impurtant, per che las incaricas da construcziun na vegnian betg suspendidas per in temp pli lung e per ch'i na resultian betg consequenzas incalculablas per l'infrastructura publica e per il mastergn local.


Infurmaziuns:
-cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch
- Victor Peer, president da la regiun Engiadina bassa / Val Müstair, tel. 081 861 00 66, e-mail V.Peer@valsot.ch


Gremi: regenza
Funtauna: rg chanzlia chantunala dal Grischun