Tut ils vehichels ch'èn admess en Svizra cun numers d'immatriculaziun ston sa suttametter ad ina controlla periodica uffiziala. Cun questa controlla successiva obligatorica giuditgescha l'uffizi per il traffic sin via, sch'ils vehichels èn anc segirs areguard il manaschi ed il traffic. In nov video da la chanzlia chantunala dal Grischun mussa, co che questa controlla vegn fatga dals experts en il Grischun en moda simpla e nuncumplitgada.

La clamada a la controlla successiva vegn directamain da l'uffizi per il traffic sin via. Las possessuras ed ils possessurs dals vehichels vegn supplitgads da preschentar lur vehichels en in dals nov lieus da controlla dal Grischun. En var 25 minutas controlleschan ils experts lura al lieu, sche per exempel ils frains, il guvernagl, las glischs e las emissiuns correspundan a las pretensiuns.

Bainvegni ed a revair
Quant simpla e nuncumplitgada ch'ina tala controlla successiva è, mussa in nov video da la chanzlia chantunala. Las possessuras ed ils possessurs dals vehichels ston mo esser punctualmain cun il vehichel e cun ils documents correspundents davant la halla da controlla. Per l'ulteriur proceder procura l'expert. Durant la controlla ston las possessuras ed ils possessurs dals vehichels per exempel mo gidar a mover il vehichel u a metter en funcziun las glischs dals frains ed ils reflecturs.

Mintga dus, trais u tuttina tschintg onns?
A l'emprima controlla successiva sto in auto da persunas vegnir manà tschintg onns suenter sia emprima immatriculaziun. Suenter l'emprima controlla sa reducescha quest interval a trais onns. Alura ston ils autos da persunas ir mintga dus onns en la halla da controlla. Las Grischunas ed ils Grischuns laschan controllar var 44 000 vehichels per onn. Sch'ils experts constateschan mancanzas, è la possessura u il possessur dal vehichel obligà da reparar respectivamain da laschar reparar quellas.

Conferma da reparatura empè da controlla posteriura
Suenter la reparatura na sto il vehichel dentant betg vegnir manà en mintga cas ad ina controlla posteriura en la halla da controlla da l'uffizi per il traffic sin via. Er garaschas privatas autorisadas dastgan confermar cun agid d'in formular uffizial ch'ellas hajan eliminà confurm a l'urden las mancanzas ch'èn inditgadas sin il rapport uffizial da la controlla dal vehichel. La conferma da reparatura ha lura l'effect d'ina controlla posteriura uffiziala.

Ulteriuras infurmaziuns davart las controllas successivas obligatoricas sin la pagina d'internet da l'uffizi per il traffic sin via


Infurmaziuns:
Jon Andrea Parli, manader da la partiziun tecnica da l'uffizi per il traffic sin via, tel. 081 257 80 40, e-mail Jon.Andrea.Parli@stva.gr.ch


Gremi: uffizi per il traffic sin via
Funtauna: rg chanzlia chantunala