La regenza ha deliberà la missiva concernent l'optimaziun da l'organisaziun da la dretgira chantunala e da la dretgira administrativa per mauns dal cussegl grond.

La cumissiun per giustia e segirezza dal cussegl grond aveva incumbensà la regenza ils 19 d'avrigl 2017 da suttametter l'organisaziun dal sistem giudizial grischun – pertutgant la giurisdicziun superiura – ad ina revisiun generala e da preschentar in rapport al cussegl grond. Il rapport è ussa avant maun.

Edifizi da dretgira cuminaivel
La regenza examinescha en quest rapport ils avantatgs ed ils dischavantatgs d'ina fusiun da la dretgira chantunala e da la dretgira administrativa ad ina dretgira chantunala superiura cun in sistem da chombras. Ina part da questa examinaziun è er la centralisaziun da las duas dretgiras chantunalas superiuras en in edifizi cuminaivel. En ina decleraziun d'intenziun dals 8 da zercladur 2011 èn las dretgiras chantunalas superiuras e la regenza sa cunvegnidas che las dretgiras possian duvrar – sch'il project "sinergia" vegn realisà dal tuttafatg – l'edifizi chantunal che stat suenter a disposiziun, sco edifizi da dretgira cuminaivel.

Augment d'effizienza tras la fusiun da las dretgiras
En il rapport explitgescha la regenza che la chargia da lavur da las dretgiras chantunalas superiuras dependia en emprima lingia dals cas che ston vegnir elavurads. L'elavuraziun dals cas na sa lascha pia strusch concepir en moda pli effizienta tras ina fusiun da la dretgira chantunala e da la dretgira administrativa. Ma in augment d'effizienza ed in tschert augment da qualitad sa mussassan dentant en il sectur da l'administraziun e da la surveglianza giudiziala, perquai che la fusiun permettess da professiunalisar las structuras correspundentas. Ultra da quai avess la fusiun da las dretgiras chantunalas superiuras avantatgs da la politica da stadi, perquai ch'ina dretgira chantunala superiura fusiunada represchentass ils interess da las dretgiras envers il cussegl grond sco er envers la regenza cun in'unica vusch e represchentass las dretgiras envers la populaziun. Cunzunt pervia da questas ponderaziuns da la politica da stadi è la regenza da l'avis che la centralisaziun da la dretgira chantunala e da la dretgira administrativa duess vegnir realisada cun la fusiun da las dretgiras chantunalas superiuras. Tant la dretgira chantunala sco er la dretgira administrativa èn dal medem avis. Sche las dretgiras chantunalas superiuras vegnan fusiunadas, pari a la regenza cunvegnent – ord vista da la politica da stadi – da stgaffir ina dretgira administrativa speziala che garantescha cunzunt la protecziun giuridica da collavuraturas e collavuraturs da la dretgira chantunala suprema tuttina sco quella da las ulteriuras collavuraturas ed ulteriurs collavuraturs dal chantun.

Midada da tscherts puncts da la procedura electorala
Dal rest envida la regenza da far midadas da tscherts puncts da la procedura electorala da las derschadras e dals derschaders da las dretgiras chantunalas superiuras, da lur autonomia sco er da la dotaziun persunala da las dretgiras chantunalas superiuras. Davart quests puncts che pertutgan l'organisaziun da las dretgiras chantunalas superiuras vegnan tschentadas pliras dumondas al cussegl grond. Las respostas da questas dumondas duain furmar la basa per il project da legislaziun che suonda.
 
Agiunta:
missiva


Infurmaziuns:
cusseglier guvernativ Peter Peyer, schef dal departament da giustia, segirezza e sanadad, tel. 081 257 25 01, e-mail Peter.Peyer@djsg.gr.ch


Gremi: regenza
Funtauna: rg chanzlia chantunala