La regenza ha deliberà per la consultaziun il sboz per ina revisiun parziala da la lescha davart l'assicuranza d'edifizis dal chantun Grischun. Il project vul en emprima lingia extender la garanzia tras l'assicuranza per las proprietarias ed ils proprietaris da chasas en cas da donns vi d'edifizis chaschunads da bovas permanentas.

Tenor la legislaziun vertenta davart l'assicuranza d'edifizis n'èn donns vi d'edifizis, che resultan d'ina uschenumnada influenza cuntinuanta, sco la pressiun dal terren u l'influenza da l'umiditad, betg assicurads. Quai tranter auter perquai che tals donns n'èn da princip betg reassicurabels. Ils 14 da mars 2019 ha l'uniun interchantunala da reassicuranza (UIR) decidì da divergiar da quest princip. Da nov duain donns totals chaschunads da bovas permanentas esser – sut tschertas premissas – reassicurabels a partir dal 1. d'avrigl 2019.

I na po betg vegnir exclus che ulteriurs privels da la natira che n'èn actualmain betg assicurads, vegnian suttamess en il futur per part u dal tuttafatg a la garanzia tras l'assicuranza. Pervia da quai èsi inditgà da conceder en il futur a la regenza la cumpetenza da suttametter tals privels a la garanzia tras l'assicuranza. En quest connex sto ella sa basar sin ils criteris renconuschids en general per surpigliar donns.

En il chantun Grischun èn differents territoris pertutgads da bovas permanentas. Uschia per exempel territoris a San Murezzan, en Val Lumnezia, da la Mantogna, ad Araschgen, en la Val Schons, en il Scanvetg (Peist, Maladers), en il Partenz (Seewis, Schiers, Küblis) u a Brinzauls. L'entrada en vigur retroactiva previsa da la revisiun parziala il 1. d'avrigl 2019 duai pussibilitar da surpigliar donns vi d'edifizis ch'èn capitads dapi questa data.

La consultaziun dura fin ils 15 da fanadur 2019. Ils documents stattan a disposiziun en l'internet sut www.gr.ch/Rumantsch/Consultaziuns currentas.


Infurmaziuns:
- cusseglier guvernativ Peter Peyer, schef dal departament da giustia, segirezza e sanadad, tel. 081 257 25 01, e-mail Peter.Peyer@djsg.gr.ch
- Hans Peter Risch, manader dal servetsch giuridic sanadad, protecziun da la populaziun e militar, tel. 081 257 25 04, e-mail Hans-Peter.Risch@djsg.gr.ch


Gremi: regenza
Funtauna: rg chanzlia chantunala dal Grischun