Sin invit da la regenza da Son Gagl ha la regenza grischuna visità oz suentermezdi il chantun Son Gagl. En il rom dal discurs da lavur a Sennwald èn vegnids tractads differents temas interchantunals.

La regenza da Son Gagl, sut la direcziun da la presidenta da la regenza Heidi Hanselmann, ha retschavì oz la regenza grischuna a Sennwald. Da la delegaziun da Son Gagl han fatg part plinavant ils cussegliers guvernativs Stefan Kölliker, Martin Klöti, Bruno Damann, Marc Mächler e Fredy Fässler sco er il chancelier Canisius Braun.

Las regenzas dals chantuns Son Gagl e Grischun èn sa scuntradas per in discurs da lavur en la vigna statala Frümsen, en il center agricul dal chantun Son Gagl. Tranter auter èn vegnids tematisads la SATE Cuira e la scola auta spezialisada da la Svizra orientala sco er ils campiunadis mundials da mastergns World Skills e Swiss Skills en la Svizra orientala. Plinavant han els tractà il tema dal project da revitalisaziun per schlargiar il Rain tranter Maiavilla e Bogn Ragaz.

Ultra dal discurs da lavur ha gì lieu ina visita guidada tras l'iert da spezias da la vigna statala. Suenter è ina tschaina cuminaivla da las duas delegaziuns stada sin il program.


Fotografia:

Las regenzas dals chantuns Son Gagl e Grischun èn sa scuntradas per in discurs da lavur a Sennwald.



Gremi: regenza
Funtauna: rg chanzlia chantunala