La regenza ha tramess en consultaziun il sboz tar la revisiun parziala da la lescha per promover il svilup economic en il chantun Grischun (lescha davart il svilup economic). La revisiun parziala è necessaria, perquai ch'il management regiunal duai vegnir concepì da nov.

La nova politica regiunala da la confederaziun (NPR) ha la finamira da promover il svilup da l'economia regiunala en il territori da muntogna, en l'ulteriur territori rural ed en las regiuns da cunfin da la Svizra. En il center da la NPR stat la promoziun d'iniziativas, da projects e da programs che rinforzan l'innovaziun, la valurisaziun e la cumpetitivitad en las regiuns. La confederaziun fixescha las directivas strategicas da la NPR mintgamai per 8 onns, entant ch'ils chantuns èn responsabels per la realisaziun da la NPR. Areguard la realisaziun èn ils chantuns libers d'etablir ina structura organisatorica – in uschenumnà management regiunal – tenor lur relaziuns specificas.

Effect manglus dal concept actual
Il management regiunal dal Grischun mussa in effect manglus cun il concept vertent (management regiunal 2016+). Las sfidas futuras concernent il svilup regiunal èn ils motivs, per ils quals la regenza ha prendì l'occasiun d'examinar fundamentalmain la structura dal management regiunal, e quai integrond las regiuns. En la revisiun parziala da la lescha davart il svilup economic vegnan proponidas differentas mesiras. Uschia duain vegnir augmentadas l'effizienza e l'efficacitad dal management regiunal e vegnir sustegnidas substanzialmain las regiuns a liquidar las incumbensas.

Duas pussaivladads realisablas
En il rapport explicativ tar la revisiun parziala vegnan preschentadas detagliadamain e valitadas duas pussaivladads da princip realisablas: la varianta "regiunalisaziun cun fin ad 11 posts dad SR en las regiuns" e la varianta "chantunalisaziun cun lieus decentrals". La regenza propona la varianta "chantunalisaziun cun lieus decentrals". Tar questa varianta èn las sviluppadras regiunalas ed ils sviluppaders regiunals (SR) emploiads dal chantun ed integrads structuralmain en il post spezialisà cumpetent da l'uffizi per economia e turissem, dentant situads en las regiuns. Per quest intent èn previs 5 lieus, per ils quals il chantun mettess a disposiziun l'infrastructura.

La consultaziun dura fin ils 4 d'october 2019. Ils documents respectivs pon vegnir consultads sut: https://www.gr.ch/RM/publicaziuns/Consultaziuns/Seiten/Laufende.aspx


Infurmaziuns:
cusseglier guvernativ Marcus Caduff, schef dal departament d'economia publica e fatgs socials, tel. 081 257 23 01, e-mail Marcus.Caduff@dvs.gr.ch


Gremi: regenza
Funtauna: rg chanzlia chantunala