La regenza ha pussibilità d'installar las basas e las premissas per realisar pli svelt ed en moda pli flexibla la strategia dad e-government. Ultra da quai ha ella concludì la revisiun parziala da l'ordinaziun tar la lescha davart l'assicuranza d'edifizis.

In ulteriur svilup da l'administraziun digitala
En il rom da la missiva tar il preventiv 2020 ha la regenza suttamess al cussegl grond in credit d'impegn da 9 milliuns francs per metter en pe las basas tecnicas e las premissas entaifer l'administraziun per pudair realisar la strategia dad e-government ils onns 2020 fin 2023. Cun il credit d'impegn pon ils singuls projects vegnir realisads en moda pli flexibla e la realisaziun da la strategia po vegnir accelerada.
Ils 26 da zercladur 2018 ha la regenza deliberà la strategia dad e-government dal Grischun 2019 fin 2023 (communicaziun da la regenza dals 28-06-2018) per pudair sviluppar vinavant il e-government en l'administraziun chantunala en moda che tegna quint dals basegns e da las finamiras, ch'è coordinada ed efficazia. Ella furma er ina basa per sviluppar vinavant la digitalisaziun da l'administraziun durant ils proxims 5 onns.

Concludì la midada da l'ordinaziun tar la lescha davart l'assicuranza d'edifizis
La regenza ha concludì la revisiun parziala da l'ordinaziun tar la lescha davart l'assicuranza d'edifizis dal chantun Grischun. Cun quai vegnan stgaffidas las premissas per ch'i possian vegnir indemnisads proprietaris d'edifizis ch'èn vegnids donnegiads totalmain tras sbuvadas permanentas. Las novas disposiziuns entran en vigur retroactivamain il 1. d'avrigl 2019.
Entant ch'il sbuvaditsch è gia oz in privel assicurà, èn ils donns chaschunads da sbuvadas permanentas vegnids exclus fin ussa explicitamain da la prestaziun da l'assicuranza sco donns elementars. En il futur duain donns totals ch'èn vegnids chaschunads da sbuvadas permanentas pudair vegnir surpigliads da l'assicuranza d'edifizis dal Grischun, sch'i èn ademplidas premissas da la tecnica d'assicuranza renconuschidas en tut la Svizra. Donns che derivan da sbuvadas permanentas, che n'èn betg da qualifitgar sco donns totals, na vegnan vinavant betg surpigliads da l'assicuranza d'edifizis. I na fiss betg duraivel da sanar adina puspè donns pli pitschens vi d'edifizis sco sfessas u sbassadas, sch'in edifizi sa chatta en ina zona da privel che glischna fermamain. Uschia vegnissan finanziadas sanaziuns permanentas, quai che n'è betg l'incumbensa d'ina assicuranza d'edifizis che duai en emprima lingia garantir l'existenza.

Societad d'ovras electricas sto analisar las consequenzas da l'utilisaziun da la forza idraulica
La regemnza oblighescha las Ovras electricas Frisal SA (OEF) a Tavanasa, d'analisar las consequenzas da lur utilisaziun da la forza idraulica, perquai ch'il Rain anteriur mussa disturbis essenzials pervia da las midadas artifizialas da la deflussiun da l'aua (undadas e sbassaments) al lieu suenter la restituziun da l'aua da questa ovra electrica.

©Uffizi federal da topografia


Gremi: regenza
Funtauna: rg chanzlia chantunala dal Grischun