La regenza ha deliberà la missiva tar la revisiun parziala da la lescha chantunala davart la protecziun da l'ambient per mauns dal cussegl grond. Cun la revisiun parziala duai vegnir stgaffida ina basa giuridica che permetta a partir dal 1. da schaner 2021 da sajettar en implants da tir mo pli sin sistems da tschiffaballas artifizials e betg pli directamain en il terren. Ils sistems da tschiffaballas artifizials èn la premissa per survegnir pli tard contribuziuns federalas per sanar ils implants da tir contaminads.

La confederaziun paja contribuziuns considerablas per sanar ils implants da tir ch'èn contaminads cun ils metals grevs toxics plum ed antimon. Las contribuziuns federalas importan actualmain 40 pertschient dals custs da sanaziun respectivamain 8000 francs per schiba per implants da tir da 300 meters. Per survegnir questas contribuziuns na dastga betg pli vegnir sajettà en il terren a partir dal 1. da schaner 2021.

Grond basegn da sanaziun
En il chantun Grischun n'è circa la mesadad dals implants da tir betg anc equipada cun sistems da tschiffaballas artifizials (STA). Las contribuziuns federalas per mesiras dal dretg davart la sanaziun dals lieus contaminads crodan davent, sch'ils implants da tir vegnan duvrads senza STA suenter il termin menziunà. Tenor la stimaziun actuala perdessan il chantun Grischun e las vischnancas en quest cas contribuziuns federalas dad en media var 60 000 francs per implant per la sanaziun dals implants da tir tenor il dretg davart la sanaziun dals lieus contaminads. Quai fissan actualmain circa 4,4 milliuns francs.

Evitar gronds custs da perdita
Damai ch'ils custs da sanaziun na pon per gronda part betg vegnir adossads als chaschunaders, resultassan gronds custs da perdita per il chantun e per las vischnancas da staziunament. Per evitar quests custs da perdita a quint dal chantun e da las vischnancas da staziunament sto vegnir stgaffida ina clera basa legala. Perquai datti in grond basegn d'agir urgent d'equipar correspundentamain ils implants da tir. Tenor il project da revisiun èn implants da tir che n'èn betg equipads cun STA fin ils 31 da december 2020 bloccads tras lescha. Sche la bloccada na vegn betg resguardada, ston las vischnancas da staziunament ch'èn responsablas per la realisaziun da las prescripziuns legalas e per la controlla da la bloccada, surpigliar dal tuttafatg ils custs da perdita.

Agiuntas:
Missiva


Infurmaziuns:
- president da la regenza Jon Domenic Parolini, schef dal departament d'educaziun, cultura e protecziun da l'ambient, tel. 081 257 27 12 (cuntanschibel da las 10.00 – 11.00), e-mail Jondomenic.Parolini@ekud.gr.ch
- Remo Fehr, manader da l'uffizi per la natira e l'ambient, tel. 081 257 27 41, e-mail Remo.Fehr@anu.gr.ch


Gremi: regenza
Funtauna: rg departament d'educaziun, cultura e protecziun da l'ambient