Ils 4 d'october 2019 ha il chantun disponì la regulaziun dal triep da lufs enturn il Beverin. La fin d'emna passada èsi gartegià a la surveglianza da chatscha da sajettar dus lufs giuvens.

Ils animals vegnan ussa analisads en l'ospital d'animals da l'universitad da Berna ed identifitgads geneticamain en l'universitad da Losanna. Entant che l'execuziun da la regulaziun dal dumber da lufs dura, na vegnan communitgads nagins ulteriurs detagls davart il lieu e davart il temp da las acziuns. L'uffizi da chatscha e pestga (UCP) vegn ad infurmar periodicamain davart l'andament da la realisaziun.

Il UCP ha survegni l'incumbensa da sajettar tut en tut quatter lufs giuvens en il territori da chatscha dal triep dal Beverin. Quest territori da chatscha vegn cunfinà dal Rain posteriur, dal Rain anteriur, dal Glogn, dal Rain da Val S. Pieder e da la lingia Val S. Pieder – Bärenhorn – Nufenen.

Ulteriuras infurmaziuns en la communicaziun a las medias dals 4 d'october 2019.


Infurmaziuns:
dr. Adrian Arquint, manader da l'uffizi da chatscha e pestga, tel. 081 257 38 92, e-mail Adrian.Arquint@ajf.gr.ch


Gremi: uffizi da chatscha e pestga
Funtauna: rg uffizi da chatscha e pestga