La cumissiun dal cussegl grond per sanadad e fatgs socials (CSF) ha predeliberà la missiva da la regenza tar las contribuziuns per sanar fermadas da bus tenor la lescha davart l'egualitad da persunas cun impediments (LImp). Ella è entrada unanimamain sin il project ed ha er decidì unanimamain ch'il chantun sustegnia las vischnancas cun 25 milliuns francs ad adattar fermadas da bus tenor ils basegns da las persunas cun impediments.

A la sesida sut il presidi da la deputada Erika Cahenzli-Philipp èn er sa participads il cusseglier guvernativ Mario Cavigelli, schef dal departament da construcziun, traffic e selvicultura, e represchentantas e represchentants da l'administraziun. En quest connex han las represchentantas ed ils represchentants da la politica fatg ina inspecziun per sa far in maletg d'ina fermada da bus sanada tenor ils basegns da las persunas cun impediments. Ina represchentanta d'ina organisaziun da persunas cun impediments ha demonstrà en quest connex, co ch'ina persuna en ina sutga cun rodas po entrar e sortir autonomamain dal bus. La demonstraziun ha però er mussà che fermadas da bus construidas tenor ils basegns da las persunas cun impediments servan la finala a tut las gruppas da la populaziun, sajan quai umans attempads, famiglias cun charrotschas d'uffants u viandantas e viandants cun bagascha.

Prescripziuns dal dretg federal
Dapi il 1. da schaner 2004 è en vigur sin plaun federal la lescha davart l'egualitad da persunas cun impediments. Tenor quella ston tranter auter installaziuns dal traffic public – tant sin binaris sco er sin via – sco er ils vehichels correspundents vegnir adattads u esser construids tenor ils basegns da las persunas cun impediments resp. senza obstachels. Il termin d'adattaziun è fixà a 20 onns a partir da l'entrada en vigur e scada pia ils 31 da december 2023. En il chantun Grischun èn responsablas las vischnancas per las fermadas da bus construidas tenor ils basegns da las persunas cun impediments. Pervia da la gronda impurtanza da l'access senza barrieras al traffic public e pervia da las sfidas e dals custs ch'èn colliads cun quai han ils posts chantunals responsabels decidì da porscher sustegn a las vischnancas. Per l'ina è vegnì elavurà in agid da lavur e da calculaziun per las vischnancas per adattar las fermadas da bus. Quest agid ha in caracter recumandativ per las vischnancas. Per l'autra duai la cofinanziaziun dal chantun per adattar fermadas da bus ussa vegnir augmentada decisivamain cun la missiva qua avant maun.

Il credit d'impegn general è incontestà
En la cumissiun n'hai dà nagin dubi d'entrar sin la fatschenta. Gist uschè incontestada è stada la dimensiun da la cofinanziaziun pli gronda dal chantun – 25 milliuns francs – concedida en furma d'in credit d'impegn general. Uschia pon ussa profitar tut las vischnancas d'ina cofinanziaziun chantunala ch'è vegnida auzada a 60 pertschient, sch'ellas adattan fermadas da bus tenor ils basegns da las persunas cun impediments, premess ch'il cussegl grond approveschia er il credit d'impegn general. La cofinanziaziun pli gronda vala fin ils 31 da december 2023.

Il cussegl grond vegn a tractar questa fatschenta en la sessiun da december 2019.


Infurmaziuns:
presidenta da la cumissiun Erika Cahenzli-Philipp, tel. 079 775 69 39


Gremi: cumissiun per sanadad e fatgs socials
Funtauna: rg cumissiun per sanadad e fatgs socials