Communicaziun da la Regenza dals 16 da schaner 2020
- Seiteninformationen
- Erste Mitteilung
- Neuen Beitrag einfügen
La Regenza ha approvà in project da via cun vastas mesiras per proteger amfibis en la Surselva. Ultra da quai ha ella dà glisch verda per in nov stabiliment da sport da stad e d'enviern a Savognin.
Renovaziun da la via tar Tavanasa cun vastas mesiras per proteger amfibis
Il project per la renovaziun da la via sursilvana, traject tranter l'access a la via d'Andiast e Tavanasa, è vegnì approvà da la Regenza. Il traject da circa 5 kilometers ha patì fermamain pervia da l'augment dal traffic pesant e pervia dals vehichels che daventan adina pli lads. En il rom dal project vegn quest traject ussa renovà e schlargià. Perquai che la via sursilvana cruscha passadis impurtants d'amfibis che sa chattan entaifer il perimeter dal project sin ina lunghezza da 2,8 kilometers, prevesa il project differentas mesiras per proteger ils amfibis. Il territori cunfinescha er cun ina plazza da fregar per amfibis d'impurtanza naziunala. Ils custs dal project da construcziun importan circa 24,6 milliuns francs.
©Uffizi federal da topografia
Il traject dal project (mellen) cunfinescha cun ina plazza da fregar per amfibis d'impurtanza naziunala (cotschen)
Il project per la renovaziun da la via sursilvana, traject tranter l'access a la via d'Andiast e Tavanasa, è vegnì approvà da la Regenza.
Glisch verda per in nov stabiliment da sport a Savognin
La Regenza ha approvà la revisiun parziala da la planisaziun locala che la vischnanca da Surses aveva concludì ils 24 da zercladur 2019. Cun quai stgaffescha ella la basa legala per realisar in stabiliment da sport da stad e d'enviern cumbinà ed ils edifizis necessaris per il manaschi en il territori "La Nars" a Savognin.
Il nov stabiliment da sport duai servir la stad sco stabiliment da tennis cun duas novas plazzas da tennis e l'enviern sco plazza da glatsch multifuncziunala (patins, curling, tschocca sin glatsch). Las novas plazzas da tennis substitueschan il stabiliment da tennis ch'è gia vegnì spazzà e che sa chattava tar la staziun da val da las Telefericas Savognin. Cumplementarmain a la nova plazza da sport "La Nars" è previs – al nordost da l'edifizi existent da la scola da skis – in nov edifizi che duai star a disposiziun als utilisaders ed als gestiunaris da las purschidas da sport.
Il stabiliment da tennis ch'exista oz en il territori "La Nars" cun duas plazzas da tennis e cun la chasa da club sco er l'edifizi existent da la scola da skis duain vegnir mantegnids. Er las loipas da passlung ch'existan gia, na vegnan betg tangadas dal nov stabiliment da sport.
©Comet Photoshopping ScRL / Dieter Enz
La Regenza ha approvà la revisiun parziala da la planisaziun locala che la vischnanca da Surses aveva concludì ils 24 da zercladur 2019.
Neuer Artikel
Gremi: Regenza
Funtauna: rg Chanzlia chantunala dal Grischun