Interpresas grischunas ch'èn pertutgadas da la crisa da corona pon dumandar a partir d'immediat – en moda subsidiara e cumplementara a las mesiras da liquiditad da la Confederaziun – credits bancars supplementars ch'èn cuvrids grazia ad ina garanzia solidarica dal chantun.
Las experientschas da fin ussa mussan ch'ils credits garantids da la Confederaziun vegnan dumandads stediamain da las interpresas. Perquai che la cuntrada d'interpresas en il chantun Grischun ha tendenzialmain structuras pitschnas ed è caracterisada fermamain dal turissem, sustegna il chantun las interpresas basegnusas en il Grischun cun agids da liquiditad supplementars. Per quest intent ha la Regenza relaschà ils 27 da mars 2020 l'Ordinaziun davart la concessiun da garanzias solidaricas en il chantun Grischun pervia dal coronavirus (Ordinaziun chantunala davart las garanzias solidaricas COVID-19).
Las garanzias solidaricas dal chantun èn limitadas a maximalmain 15 pertschient dal retgav annual decisiv da la svieuta ed a 5 milliuns francs en il cas singul. Ensemen cun las garanzias solidaricas da la Confederaziun pon pia vegnir prestads agids da liquiditad fin a 25 pertschient da la svieuta annuala. Ils credits ston vegnir amortisads cumplettamain entaifer la perioda da 5 onns e vegnan tschainsids cun 0,0 pertschient fin a 500 000 francs e cun 0,5 pertschient per in import pli grond.
Inoltrar a la banca la dumonda da conceder in credit
Ina interpresa cun sedia en il Grischun che ha exaurì cumplainamain las pussaivladads sin plaun federal e che vuless dumandar in credit supplementar cun ina garanzia solidarica dal chantun, po inoltrar la dumonda da credit ad ina banca participanta (per regla la banca principala da l'interpresa). Las infurmaziuns ed ils documents ch'èn necessaris per far la dumonda stattan a disposiziun sin la pagina d'internet da l'Uffizi per economia e turissem a partir d'immediat.
Las bancas participantas examineschan la bonitad e redigian ina recumandaziun per mauns dal chantun. Il basegn supplementar da liquiditad sto vegnir cumprovà e la concessiun dal credit sto pudair vegnir giustifitgada da la banca a maun d'ina procedura per controllar il credit. En cas d'ina recumandaziun da credit positiva fixescha il chantun cun la banca correspundenta ina garanzia solidarica a favur da l'interpresa. Sin quai fa la banca in contract da credit cun l'interpresa petenta e conceda ad ella la limita da credit. In post central designà dal chantun notescha d'in cuntin las limitas da credit concedidas e po far emprovas per controllar la qualitad.
Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e-mail Marcus.Caduff@dvs.gr.ch
Gremi: Regenza
Funtauna: rg Chanzlia chantunala