En il senn d'ina regulaziun unitara desista il chantun Grischun da l'obligaziun annuala da tir per la chatscha per l'onn 2020. Chatschadras e chatschaders grischuns pon perquai retrair la patenta da las differentas chatschas senza la cumprova da tir. Ultra da quai èn vegnidas adattadas las premissas per l'admissiun a l'examen d'armas e da tir 2020.

Obtegnair ina cumprova da tir è ina premissa per las chatschadras ed ils chatschaders grischuns per retrair la patenta da las differentas chatschas. Pervia da las mesiras da protecziun prescrittas dal Cussegl federal na po in manaschi ordinari da tir per la chatscha e per il militar betg vegnir garantì quest onn. Pervia da quai ha la Confederaziun desistì da l'obligaziun obligatorica da tir. Ultra da quai n'èsi anc betg cler, sche las mesiras da protecziun vegnan schluccadas vinavant suenter il 8 da zercladur 2020 u sche la pandemia s'accentuescha puspè pervia d'ina unda da grippa che suonda. Pervia da la situaziun actuala ha la Conferenza svizra dals servetschs da chatscha e da pestga (CCP) recumandà als chantuns da sistir la cumprova da tir da chatscha per l'onn 2020. Pervia da la pandemia dal coronavirus desistan blers chantuns gia ussa ch'ella stoppia vegnir ademplida l'onn 2020.

Regulaziun unitara
Pervia da las difficultads menziunadas ed en il senn d'ina regulaziun unitara tranter ils chantuns vegn er il Grischun a desister da l'obligaziun annuala da tir per la chatscha per l'onn 2020. Il manaschi da tir per la chatscha en il Grischun vegn organisà quest onn uschia che las chatschadras ed ils chatschaders grischuns pon ademplir lur obligaziuns legalas cun exercitar lur segirezza da culp e cun regular lur arma da chatscha avant il cumenzament da la chatscha respectiva.

Preparaziuns pli curtas per l'examen d'armas e da tir 2020
Da las mesiras da protecziun ordinadas dal Cussegl federal è ultra da quai pertutgada fermamain la realisaziun da l'examen da qualificaziun per la chatscha. Sin basa da las mesiras da protecziun ordinadas dal Cussegl federal dapi il mars e pervia da las restricziuns che resultan da talas per preparar l'examen da chatscha èn vegnidas adattadas las premissas per l'admissiun a l'examen d'armas e da tir 2020. Empè d'almain 30 uras prestaziun da tgira e 18 uras scolaziun d'armas e da tir ston vegnir furnidas l'onn 2020 mo 10 uras prestaziun da tgira e 6 uras scolaziun d'armas e da tir sco premissa per vegnir admess a l'examen d'armas e da tir. Las pretensiuns a l'examen restan talas e qualas.

Infurmaziuns:
- cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
- Adrian Arquint, manader da l'Uffizi da chatscha e pestga, tel. +41 81 257 38 91, e-mail Adrian.Arquint@ajf.gr.ch

Gremi: Departament d'infrastructura, energia e mobilitad
Funtauna: rg Departament d'infrastructura, energia e mobilitad