La Regenza ha deliberà la missiva per ina revisiun parziala da la Lescha per promover la tgira da persunas malsaunas e l'assistenza da persunas attempadas e da persunas che basegnan tgira (Lescha per promover la tgira da persunas malsaunas, LTM) per mauns dal Cussegl grond.

En il model directiv concernent l'organisaziun dal provediment da la sanadad en il chantun Grischun da l'onn 2013 ha il Departament da giustia, segirezza e sanadad preschentà las structuras dal provediment da la sanadad ch'èn necessarias per ch'il chantun disponia er en l'avegnir d'in sistem da provediment da la sanadad che proveda tut las regiuns e ch'è supportabel economicamain. Il model directiv cuntegna in confess al sistem da provediment actual cun ospitals decentrals. 
Cun la revisiun parziala vul la Regenza realisar las mesiras ch'èn cuntegnidas en il model directiv per furmar regiuns da provediment da la sanadad e per dar impuls per furmar in unic purtader dals furniturs da prestaziuns instituziunals entaifer mintga regiun da provediment da la sanadad.

Regiuns da provediment da la sanadad remplazzan las regiuns d'ospital
La divisiun actuala dal chantun Grischun en regiuns d'ospital vegn extendida sin il sectur da las chasas da persunas attempadas e da tgira sco er sin il sectur da la spitex. En la regiun da provediment da la sanadad Val dal Rain grischuna prevesa il sboz da revisiun da furmar trais subregiuns. Decisivs per questa decisiun èn il dumber d'abitantas ed abitants sco er il dumber da furniturs da prestaziuns instituziunals per ademplir las incumbensas da la tgira staziunara, da l'assistenza da pazients stabels e da persunas attempadas, da la tgira e da l'assistenza a chasa sco er da la promoziun da la sanadad e da la prevenziun. La concepziun congruenta dals intschess da las regiuns d'ospital, da las regiuns da chasas da persunas attempadas e da tgira sco er da las regiuns da spitex permetta ina planisaziun coordinada, ina concepziun optimala da la collavuraziun tranter ils furniturs da prestaziuns instituziunals e pia er ina concepziun optimala da la fluctuaziun dals pazients.

Betg persequitada vinavant na vegn la proposta dal sboz da revisiun d'obligar las vischnancas d'ina regiun da provediment da la sanadad da constituir ina fundaziun, a la quala ils purtaders dals ospitals, da las chasas da persunas attempadas e da tgira e dals servetschs da la tgira ed assistenza a chasa avessan pudì surdar la gestiun strategica ed operativa dal manaschi. Ina clera maioritad da las participantas e dals participants da la consultaziun ha refusà questa proposta.

Impuls finanzials per furmar in unic purtader 
Las sfidas actualas e vegnintas en ils fatgs da sanadad pretendan ina fusiun u almain ina collavuraziun pli intensiva dals furniturs da prestaziuns instituziunals d'ina regiun da provediment da la sanadad sin plaun strategic ed operativ. Ils ospitals (cun excepziun da l'Ospital chantunal dal Grischun), las chasas da persunas attempadas e da tgira ed ils servetschs da spitex dal chantun Grischun han ina grondezza da manaschi memia pitschna per pudair vegnir a frida a lunga vista en moda efficazia cun las cundiziuns generalas che daventan pli e pli severas en ils fatgs da sanadad e cun las sfidas che resultan en quest connex.

La fusiun sco er la collavuraziun pli intensiva dals furniturs da prestaziuns instituziunals duain perquai vegnir promovidas dal chantun cun impuls finanzials. Tut en tut vegn dumandà in credit d'impegn da 5 milliuns francs. Ina premissa per survegnir contribuziuns correspundentas duai esser ch'ils projects prendian ina da las suandantas mesiras per optimar las structuras: surdar la gestiun strategica ed operativa dal manaschi da tut ils furniturs da prestaziuns instituziunals d'ina regiun da provediment da la sanadad respectivamain d'ina subregiun, fusiunar ils furniturs da prestaziuns da questas regiuns ubain colliar e coordinar ils furniturs da prestaziuns instituziunals d'ina regiun da provediment da la sanadad. Supplementarmain vegni pretendì ch'ils projects correspundian a la politica da sanadad chantunala e ch'els gidian a garantir il provediment decentral da la sanadad. Projects per fusiunar regiuns da provediment da la sanadad duain medemamain vegnir sustegnids cun contribuziuns.

La realisaziun da questas mesiras per optimar las structuras dal provediment da la sanadad en il chantun Grischun duai contribuir al fatg ch'il chantun dispona er a lunga vista d'in sistem da sanadad d'auta qualitad ed economicamain supportabel che proveda tut las regiuns.

La debatta davart la missiva è previsa en la sessiun d'avust 2020 dal Cussegl grond.

Agiunta:
missiva e corrigenda

Infurmaziuns:
cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e-mail Peter.Peyer@djsg.gr.ch

Gremi: Regenza
Funtauna: rg Chanzlia chantunala dal Grischun