Dals 402 giuvenils che han fatg quest onn l'examen unifitgà per l'admissiun a la 3. classa gimnasiala u per la 1. classa da la scola media commerziala u da la scola media spezialisada, han 179 (44,5 pertschient) dumagnà l'admissiun en la 3. classa gimnasiala e 135 (33,6 pertschient) en la 1. classa da la scola media commerziala u da la scola media spezialisada. L'onn precedent è la quota da success per entrar en la 3. classa gimnasiala stada in zic pli auta cun 45,3 pertschient, percunter per entrar en la 1. classa da la scola media commerziala u da la scola media spezialisada cleramain pli bassa cun 25,9 pertschient. La quota d'admissiun per entrar en la 3. classa gimnasiala importa quest onn var 11 pertschient cumpareglià cun l'annada da referenza (2019: 10,7 pertschient).

Examens finals a las scolas medias dal Grischun
En vista a la pandemia COVID-19 han las scolaras ed ils scolars sco er lur persunas d'instrucziun stuì avair pazienza, fin ch'igl è stà cler, sche e sut tge premissas ch'ils examens finals da quest onn pon vegnir realisads. Ils 30 d'avrigl 2020 ha la Regenza grischuna decidì sin basa dals decrets dal Cussegl federal e da la Conferenza svizra da las directuras e dals directurs chantunals da l'educaziun publica (CDEP) da manar tras ils examens finals en scrit en ils gimnasis ed en las scolas medias spezialisadas, e quai al lieu ed observond las prescripziuns vertentas da distanza e d'igiena, dentant da renunziar als examens a bucca. Pervia da questa renunzia han las disposiziuns davart la calculaziun da las notas finalas dals gimnasis e da las scolas medias spezialisadas stuì vegnir adattadas per l'onn da scola 2019/20. En las scolas medias commerzialas n'èn – pervia da las directivas dal Cussegl federal – vegnids fatgs nagins examens finals. Pervia da quai èn las disposiziuns per calcular las notas en las scolas medias commerzialas vegnidas regladas da las instanzas cumpetentas sin plaun federal e realisadas en cunvegnientscha tranter l'Uffizi chantunal per la furmaziun media-superiura e l'Uffizi chantunal per la furmaziun professiunala.

Grazia al grond engaschament da las scolas medias, da las persunas d'instrucziun sco er da las scolaras e dals scolars ha er questa sessiun d'examens extraordinaria pudì vegnir terminada cun success ed entaifer il termin previs avant las vacanzas da stad. Da totalmain 527 scolaras e scolars (369 gimnasi, 64 scola media spezialisada, 65 maturitad spezialisada, 29 scola media commerziala) che han fatg ils examens finals 2020 en las 9 scolas medias dal Grischun han 523 dastgà prender en consegna lur attestat final ils ultims dis. Per las absolventas ed ils absolvents che han fatg quests examens cun success è garantida uschia ina cuntinuaziun senza interrupziun da lur scolaziun suenter quest onn da scola caracterisà da la pandemia.

Auskunftsperson:
Dr. Hans Peter Märchy, manader da l'Uffizi per la furmaziun media-superiura, tel. +41 81 257 61 66, e-mail Hans.Peter.Maerchy@ahb.gr.ch

Gremi: Uffizi per la furmaziun media-superiura
Funtauna: rg Uffizi per la furmaziun media-superiura