Da nov sa chattan tuts dus stabiliments giudizials chantunals a Cazas. Tut ils products che derivan dals stabiliments giudizials Realta e Cazas Tignez vegnan perquai commerzialisads a partir d'immediat en moda unitara. Per quest intent è vegnida elavurada ina nova cumparsa generala che dat in'atgna fatscha a la lavur impurtanta da las persunas arrestadas.

Cun la marca "inhaft geschaffen" ha l'agentura da reclama Hü7 da Tusaun creà ina nova cumparsa per ils products da las praschuns grischunas. Quella exprima er concepziunalmain la vischinanza e la stretga collavuraziun dals dus stabiliments giudizials grischuns. Il design intermediescha quai ch'ils stabiliments giudizials dal Grischun represchentan: qualitad, producziuns individualas e creativas, regiunalitad e durabilitad. Il messadi central da la nova marca è quella che las persunas che produceschan ils products na vivan betg en libertad. Nagina bagatellisaziun – in num cler e sincer che na valitescha betg, mabain ch'exprima quai ch'igl è effectivamain: products creads en arrest – "inhaft geschaffen".

La lavur da las persunas arrestadas è impurtanta
Il Cudesch penal oblighescha las praschunieras ed ils praschuniers da lavurar – ina part impurtanta per il success dal chasti d'arrest. L'activaziun tras la lavur è ina contribuziun impurtanta per promover las abilitads socialas e professiunalas da las persunas arrestadas. Uschia s'augmentan las schanzas da pudair manar ina vita senza chastis ed en atgna responsabladad suenter l'execuziun dal chasti. Tras la decleraziun dals products cun la marca "inhaft geschaffen" survegn la lavur da las persunas arrestadas ina fatscha e la stima ch'ella merita – quai è in giavisch da l'Uffizi per l'execuziun giudiziala.

Producziun multifara – grond potenzial
Lain, metal, material sintetic: Il stabiliment giudizial serrà Cazas Tignez ed il stabiliment giudizial cunfinant avert Realta produceschan rauba d'auta qualitad or da bleras sorts da material. Il manaschi agricul dal stabiliment giudizial Realta producescha charn, legums e fritgs. Ils products dals lavuratoris e da l'agricultura pon vegnir cumprads al lieu en la butia cuminaivla dal bain puril, tar ils manaschis da producziun respectivs sco er online. Ultra da la producziun d'atgnas lingias da products exequeschan ils lavuratoris er incaricas da producziun per il mastergn local.

Fotografia agiuntada:

Infurmaziuns:
- Mathias Fässler, manader da l'Uffizi per l'execuziun giudiziala dal Grischun, tel. +41 81 257 52 51, e‑mail Mathias.Faessler@ajv.gr.ch
- Nina Albin, manadra da Lavur & economia, Stabiliment giudizial Cazas Tignez, tel. +41 81 423 12 06, e‑mail Nina.Albin@ajv.gr.ch
- Christian Schmid, manader Mastergn, Stabiliment giudizial Realta, tel. +41 81 257 46 70, e‑mail Christian.Schmid@ajv.gr.ch

Gremi: Uffizi per l'execuziun giudiziala
Funtauna: rg Uffizi per l'execuziun giudiziala