Ils potenzials economics en ils territoris da muntogna spezialmain periferics duain vegnir tratgs a niz meglier. En collavuraziun cun ils chantuns ha la Confederaziun lantschà in program specific per ils chantuns da muntogna per la perioda 2020–2023. A partir d'immediat stattan a disposiziun tut en tut 3,4 milliuns francs per realisar l'uschenumnà "Program per ils territoris da muntogna Grischun 2020–2023".
La finamira primara dal Program per ils territoris da muntogna è quella da dar impuls da svilup a l'economia en ils territoris da muntogna periferics. Cun prender mesiras da pilot en il rom da la Nova politica regiunala (NPR) duain vegnir tratgs a niz ils potenzials da questas regiuns. Questas mesiras da pilot NPR mettan il focus sin il rinforzament da la capacitad da concurrenza e d'innovaziun, sin la creaziun da plazzas da lavur sco er sin l'augment da la valurisaziun. Ultra da quai vegn persequitada cun las mesiras da pilot NPR la finamira d'examinar l'effect da novas mesiras e da rimnar svelt experientschas concretas per eventualmain sviluppar vinavant la NPR uschia ch'ella po tegnair quint meglier da las sfidas particularas dals territoris da muntogna periferics.
Ulteriurs meds finanzials per infrastructuras pli pitschnas
En il rom dal "Program per ils territoris da muntogna Grischun 2020–2023" pon vegnir sustegnids cun contribuziuns à‑fonds‑perdu projects d'ulteriurs tschintg champs tematics cumplementarmain a las mesiras existentas dal Program da realisaziun NPR chantunal 2020–2023. Uschia pon per exempel vegnir promovidas cun contribuziuns à‑fonds‑perdu infrastructuras turisticas pli pitschnas cun attracziun regiunala. Per promover uschenumnadas prestaziuns preliminaras, pia per sclerir, sche las ideas pon vegnir realisadas, u per furmar instituziuns purtadras stattan medemamain a disposiziun meds finanzials supplementars. Ultra da quai pon pitschens projects innovativs vegnir sustegnids cun contribuziuns da ristga.
Planisaziun strategica da la politica regiunala
Per quest intent stattan a disposiziun al chantun Grischun 3,4 milliuns francs. 70 pertschient van a donn e cust da la Confederaziun, 30 pertschient vegnan surpigliads dal chantun Grischun. A l'avis da la Confederaziun duain las experientschas che vegnan a resultar dals projects en il rom da questas mesiras da pilot, vegnir integradas en la planisaziun strategica da la politica regiunala a partir da l'onn 2024.
Ils criteris per promover projects en il rom dal "Program per ils territoris da muntogna Grischun 2020–2023" sco er in formular da dumonda correspundent per petentas e petents stattan a disposiziun sin la pagina d'internet da l'Uffizi per economia e turissem.
Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e‑mail Marcus.Caduff@dvs.gr.ch
Gremi: Departament d'economia publica e fatgs socials
Funtauna: rg Departament d'economia publica e fatgs socials