Il chantun conceda a manaschis da gastronomia ina indemnisaziun per products frestgs gia cumprads che van en decadenza pervia da las mesiras concludidas ils 2 da december 2020. Per quest intent ha la Regenza deliberà ina revisiun parziala da l'Ordinaziun chantunala davart COVID-19 cas da direzza.

En il rom dal concept da protecziun general per il Grischun ha la Regenza concludì tranter auter che tut ils manaschis da restauraziun stoppian serrar per 2 emnas. Perquai che quest conclus è vegnì decretà e communitgà a curta vista, èn ils manaschis da gastronomia pertutgads spezialmain da las mesiras. Per part n'han els betg pli pudì franar ad ura la cumpra da products frestgs.

Grazia a la revisiun parziala da l'Ordinaziun davart la reducziun da cas da direzza economics en il chantun Grischun pervia dal coronavirus pon ils manaschis pertutgads dumandar ussa ina indemnisaziun per ils custs resultads. Las indemnisaziuns èn limitadas a maximalmain 10 000 francs. Las dumondas pon vegnir inoltradas per e‑mail u per posta fin ils 13 da december 2020. Las infurmaziuns ed ils documents ch'èn necessaris per far la dumonda stattan a disposiziun sin la pagina d'internet dal Departament d'economia publica e fatgs socials.

Agiunta:
ordinaziun

Infurmaziuns: 
cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e‑mail Marcus.Caduff@dvs.gr.ch 

GGremi: Departament d'economia publica e fatgs socials
Funtauna: rg Departament d'economia publica e fatgs socials