La Regenza ha concedì ina contribuziun da tut en tut 514 000 francs en il rom da la Nova politica regiunala da la Confederaziun (NPR) per il project "Fairtrail en il Grischun 2021-2023". Las contribuziuns NPR van mintgamai per la mesadad sin donn e cust da la Confederaziun e dal chantun.
Cun graubündenHIKE, graubündenBIKE e graubündenTRAILRUN ha il Grischun surpiglià ina rolla da piunier ed ha uschia acquistà in avantatg da concurrenza en il sectur dal traffic betg motorisà (viandar, ir cun velo da muntogna). Sch'i vegn cuntinuà cun la mesira "fairtrail", po il Grischun mantegnair quest avantatg. In punct central dal project è quel da sensibilisar sistematicamain las diversas gruppas en mira sin la rait da vias e sendas da viandar e da bike e pia da minimar il potenzial da conflicts. Responsabel per il project è l'Uffizi da construcziun bassa sco Post spezialisà per il traffic betg motorisà.

Per ils onns 2020-2024 ha la Regenza approvà mintgamai ina cunvegna da prestaziun tranter il chantun e la Pro Natura Grischun sco er tranter il chantun e la fundaziun Bergwaldprojekt. L'incumbensa da la Pro Natura Grischun pertutga la tgira da territoris da protecziun. L'organisaziun per la protecziun da la natira tgira e surveglia mintga onn surfatschas da biotops da var 120 hectaras. Bundant la mesadad da quai èn biotops d'impurtanza naziunala. Ultra da la tgira da territoris da protecziun realisescha la Pro Natura Grischun divers projects e differentas campagnas en il sectur da la lavur da publicitad e da l'educaziun da l'ambient. Ils custs per questas prestaziuns èn vegnids finanziads fin ussa tras cunvegnas annualas cun daners federals e chantunals. Per ils onns 2020-2024 vegnan questas incumbensas ussa regladas e finanziadas tras ina cunvegna da prestaziun che cuntegna ina contribuziun chantunala totala da var 800 000 francs ed ina contribuziun federala da la medema autezza.
Tras la cunvegna da prestaziun tranter il chantun e la fundaziun Bergwaldprojekt duain vegnir reglads l'augment da la valur, la tgira sco er las mesiras a favur da la protecziun da las spezias al Crap de Maria en la vischnanca da Castaneda. Il territori sitg ha ina grondezza da bundant 29 hectaras e dispona d'in dumber e d'ina diversitad extraordinaria da spezias da la Glista cotschna, en spezial tgirallas dal di e salips. Dapi l'onn 2018 è vegnida intensivada la pasculaziun cun chauras, uschia ch'i n'è betg mo pussaivel da mantegnair a lunga vista il territori sco spazi da viver per las numerusas spezias periclitadas, mabain er il prezius maletg da la cuntrada. Acziuns da tgira da plirs onns èn dentant er necessarias, sche la pasculaziun cun chauras è vegnida intensivada. Tras la cunvegna da prestaziun è questa incumbensa vegnida surdada a la fundaziun Bergwaldprojekt. Ella survegn ina contribuziun chantunala da totalmain 428 000 francs per quest intent.
Il mantegniment da la cuntrada alpina singulara e da la biodiversitad è in dals puncts che vegnan prendids en mira en il Program da la Regenza 2021-2024.

La via dal Lucmagn è ina via principala che maina da la Surselva tras la Val Medel fin al cunfin cun il Tessin. La Regenza ha ussa approvà in project per realisar la gallaria da lavinas Scopi 3.
En il territori directamain sper il portal nord da la gallaria actuala exista per lung da la via in grond privel da lavinas. Per proteger duraivlamain quest traject cunter lavinas duai la gallaria da lavinas existenta vegnir prolungada per circa 320 meters cun la nova gallaria da lavinas Scopi 3. Cun prolungar la gallaria da lavinas po la durada da las serradas da la via dal Lucmagn vegnir reducida dad actualmain 37 dis en media a 19 dis en media en l'avegnir. Tras la prolungaziun èsi ultra da quai previs da concepir da nov la via da velos e la senda da viandar, l'access als stabiliments dal lai da fermada sco er l'access a la centrala da las gallaria da lavinas Scopi. Tut en tut custa il project circa 16,3 milliuns francs.

La Regenza ha approvà in project per survegliar ils trais territoris Fueina da Spral, Casa da Maschinas e Crap Leller en la vischnanca da Breil. Il project custa tut en tut circa 120 000 francs. En quests trais territoris sa chattan plirs grips instabils che pericliteschan la via sursilvana tranter Rueun e Tavanasa tras crudada da crappa e da grippa. Ils grips che pudessan crudar giu èn situads en in'autezza dad 80 fin 160 meters sur la via ed han in volumen dad intgins tschient fin plirs milli meters cubic. Sche quests grips crudassan giu, stuess ins far quint ch'il traffic sin la via sursilvana vegniss interrut durant plirs dis. En il rom dal project vegnan observads e mesirads ils grips labils. Sin basa dals resultats pon plinavant vegnir evaluadas mesiras da protecziun.