La Regenza ha approvà il nov statut da la Centrala interchantunala per meds d'instrucziun (CIMI). La CIMI è ina corporaziun da dretg public dals chantuns, che als sustegna a metter a disposiziun ina purschida da meds d'instrucziun d'auta qualitad. Il svilup da meds d'instrucziun da la Svizra tudestga e dals chantuns plurilings vegn coordinà dapi l'onn 1973 en il rom da la CIMI. Commembers da la CIMI èn tut ils 21 chantuns germanofons e plurilings da la Svizra (inclusiv il Grischun) sco er il Principadi da Liechtenstein.
Il nov statut chaschuna ussa ina reorganisaziun fundamentala da la Centrala per meds d'instrucziun. Da nov vegn il secretariat – fin ussa independent – affilià a la Conferenza dals directurs d'educaziun da la Svizra centrala cun ina cunvegna da prestaziun. Las chasas edituras ed ils posts per meds d'instrucziun dals chantuns na vegnan betg pli menziunads en il nov statut e na ston er betg pli pajar ina contribuziun. A partir da l'onn 2022 vegn la CIMI finanziada mo pli tras las contribuziuns annualas dals chantuns commembers, che vegnan fixadas sin basa dal dumber d'abitantas ed abitants.

La Regenza ha respundì la petiziun "Naginas acziuns nunponderadas en il Grischun" concernent la pandemia dal coronavirus. Las petiziunarias ed ils petiziunaris crititgeschan ch'il temp da preparaziun per realisar las mesiras chantunalas cunter COVID‑19 manchia. Plinavant pretendan ellas ed els che criteris mesirabels cleramain areguard la durada da las mesiras prendidas vegnian definids. La petiziun è vegnida sustegnida da 1150 persunas.
La Regenza ha chapientscha per il giavisch d'in temp da preparaziun pli lung en connex cun la disposiziun da mesiras cunter COVID‑19. Displaschaivlamain n'è in tal betg adina pussaivel pervia da facturs betg influenzabels. Uschia poi dar situaziuns che pretendan ch'i vegnia agì immediatamain. Imaginabel en quest connex èn per exempel midadas a curta vista e marcantas da la situaziun epidemiologica u mesiras cumplementaras urgentas pervia d'acziuns da la Confederaziun. La Regenza sa stenta però d'observar in temp da preparaziun lung avunda, nua che quai è pussaivel.
Er per il segund criteri concernent ina clera definiziun da criteris ha la Regenza chapientscha. Las experientschas fatgas fin ussa en Svizra ed a l'exteriur cun la pandemia dal coronavirus han però mussà, ch'igl è – pervia da la cumplexitad dals eveniments e da las relaziuns – extremamain difficil da colliar ordavant l'introducziun, l'extensiun e l'aboliziun da mesiras cun criteris liants. La Regenza vegn però a sa stentar vinavant da stgaffir er en quest reguard ina transparenza ed ina previsibladad uschè gronda sco pussaivel.