Il nov lockdown ha vastas consequenzas, er per las interpresas grischunas. Quellas duain ussa pudair profitar uschè svelt sco pussaivel da las mesiras da la Confederaziun per cas da direzza. Perquai ha la Regenza revedì l'Ordinaziun chantunala davart cas da direzza e mess en vigur quella retroactivamain per il 1. da schaner 2021. L'execuziun è vegnida preparada da nov.

Las basas da la Confederaziun èn vegnidas midadas cuntinuadamain durant las ultimas emnas, l'ultima giada per ils 14 da schaner 2021. Las ultimas adattaziuns èn vastas, en spezial en vista a l'execuziun da l'Ordinaziun davart cas da direzza. Pervia dal nov lockdown stoi vegnir quintà cun cleramain dapli dumondas da singulas interpresas. Il chantun fa quint cun var quatter giadas dapli dumondas – circa 2000 empè da 500 sco avant.

Plinavant na poi betg vegnir stimà, quantas interpresas che vegnan ad inoltrar dumondas per singulas spartas da l'interpresa. Quai po da l'autra vart augmentar fermamain il dumber da dumondas ed ils custs. Per quests motivs ha la Regenza ussa simplifitgà drasticamain l'execuziun da l'Ordinaziun davart cas da direzza.

Perdita da la svieuta d'almain 15 pertschient
Il Cussegl federal ha schluccà las cundiziuns ch'ina interpresa sto ademplir per survegnir agid per cas da direzza. En spezial na ston interpresas ch'èn serradas uffizialmain durant almain 40 dis, betg pli cumprovar ina perdita da la svieuta da 40 pertschient. Interpresas ch'èn restrenschidas mo considerablamain en lur activitad commerziala, ma che n'èn betg serradas, ston furnir questa cumprova. Il chantun Grischun è sa drizzà tenor questas disposiziuns ed ha introducì in criteri supplementar. En il Grischun vegnan resguardadas mo interpresas che han ina perdita da la svieuta d'almain 15 pertschient en relaziun cun l'entira interpresa.

Dumondas pon puspè vegnir inoltradas a partir d'immediat. Per las interpresas dal commerzi en detagl ch'èn serradas dapi ils 18 da schaner 2021, è l'execuziun anc en svilup. Il chantun supplitgescha perquai questas interpresas d'avair in pau pazienza e chapientscha.

Consequenzas finanzialas
Fin ussa stattan a disposiziun meds finanzials da 39 milliuns francs (incl. custs d'execuziun). Per realisar l'Ordinaziun adattada davart cas da direzza ha la Regenza deliberà ina dumonda per in credit posteriur da 61 milliuns francs per mauns da la Cumissiun da gestiun dal Cussegl grond (CdG), uschia ch'i stattan ussa a disposiziun tut en tut 100 milliuns francs. La dumonda resguarda la situaziun giuridica actuala ed il lockdown fin la fin da favrer 2021. La CdG sto anc approvar quest credit posteriur.

Il formular da dumonda e tut las ulteriuras infurmaziuns per retrair agids per cas da direzza stattan a disposiziun sin la pagina d'internet dal Departament d'economia publica e fatgs socials.

Agiunta:
Preschentaziun

Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)

Gremi: Regenza
Funtauna: Chanzlia chantunala