Las cundiziuns per las abitantas ed ils abitants da las chasas da persunas attempadas e da tgira vegnan abolidas, sch'ellas ed els èn vaccinads cunter il coronavirus. Questa decisiun ha l'Uffizi da sanadad prendì sin fundament da l'effect cumprovà da la strategia chantunala da vaccinaziun e da test.

Il cumenzament da schaner èn las abitantas ed ils abitants da las chasas da persunas attempadas e da tgira sco er lur persunal d'assistenza e da tgira vegnids vaccinads sco emprimas persunas en il chantun cunter il coronavirus. En il fratemp èn passa 80 % da tut las abitantas e da tut ils abitants da las chasas da persunas attempadas e da tgira vaccinads duas giadas e pia immuns. Dus mais pli tard sa mussi che las mesiras han effect: Dapi il cumenzament da favrer n'hai betg pli dà persunas vaccinadas cun in test positiv en questas instituziuns. Per quest motiv ha l'Uffizi da sanadad abolì las regulaziuns da visita ch'eran vegnidas deliberadas da la Regenza e disponidas da l'Uffizi da sanadad ils 26 da matg respectivamain ils 7 da settember 2020 per las chasas da persunas attempadas e da tgira.

Aboliziun da las regulaziuns da visita per abitants vaccinads
Las abitantas ed ils abitants che han gia survegnì la segunda vaccinaziun cunter il coronavirus avant almain 15 dis, na ston betg pli purtar ina mascrina entaifer l'instituziun. Plinavant vegn abolida la quarantina da contact per ellas ed els. Quai vala er per entradas novas. Visitadras e visitaders sco er collavuraturas e collavuraturs che han survegnì la segunda vaccinaziun avant dapli che 15 dis, ston percunter purtar vinavant mascrinas. Ultra da quai vegnan ellas ed els registrads cun lur datas da contact en ina glista per il contact tracing.

Mesiras schluccadas per persunas vaccinadas
Per persunas che han survegnì la segunda vaccinaziun avant main che 15 dis, valan mesiras schluccadas. Las abitantas ed ils abitants dastgan retschaiver lur visitas en las chombras, en ils manaschis da restauraziun u en stanzas ch'èn determinadas spezialmain per quest intent. Visitas en chombras da plirs letgs èn permessas mo, sche l'abitanta u l'abitant na po betg bandunar la chombra. Las visitadras ed ils visitaders sco er las abitantas ed ils abitants èn obligads vinavant da purtar mascrinas ed i èn admessas maximalmain duas visitadras u visitaders; la direcziun da la chasa decida davart excepziuns. Las visitadras ed ils visitaders ston s'annunziar ordavant, s'inscriver cun lur datas da contact en ina glista sco er sa declerar d'accord, ch'ellas ed els observian las reglas da cumportament da la chasa.

Vinavant mesiras cumplessivas da protecziun per gruppas da ristga
Las abitantas ed ils abitants che n'èn betg vaccinads ston s'inscuntrar per visitas en lur chombra, en ils manaschis da restauraziun da l'instituziun u ordaifer la chasa da persunas attempadas e da tgira. Plinavant ston ellas ed els – sche pussaivel – purtar ina mascrina ed observar la distanza da segirezza dad in meter e mez envers autras persunas. Entradas novas ston anc adina sa render en quarantina. En cas d'in test negativ po la quarantina dentant vegnir terminada anticipadamain il settavel di. Sch'il test vegn refusà, ston ellas sa render en quarantina per 10 dis. Quai vala er per las abitantas ed ils abitants che han gì contact cun ina persuna cun in test positiv sin il coronavirus.

Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch

Gremi: Uffizi da sanadad
Funtauna: rg Uffizi da sanadad