La Regenza ha approvà il project "Gallaria da sondagi per la bova a Brinzauls" da la vischnanca d'Alvra ed ha garantì per quest intent ina contribuziun chantunala da maximalmain 9,5 milliuns francs. Per il project inclusiv il manaschi èn budgetads custs totals da var 10,6 milliuns francs. La gallaria da sondagi da var 600 meters lunghezza duai furnir ils proxims onns infurmaziuns fundamentalas per la sanaziun da la bova. Davent da la gallaria pon vegnir exploradas e caracterisadas las relaziuns dal grip stabil cunfinant sut la bova sco er da la massa glischnanta. Sch'ils resultats dal sondagi èn positivs, po la gallaria da sondagi vegnir extendida ad ina gallaria per allontanar l'aua. La grondezza dal profil traversal da la gallaria permetta da construir ina gallaria per allontanar l'aua d'ina lunghezza da var 1,8 kilometers. Il project "Gallaria da sondagi per la bova a Brinzauls" cumpiglia ultra da quai in concept da surveglianza che mussa tant las consequenzas positivas sco er negativas d'in sistem d'allontanar l'aua per il territori da la bova.

La bova a Brinzauls è fitg cumplexa ed è actualmain ina da las sfidas las pli grondas en connex cun moviments da massa en il territori alpin. Perquai che er ils moviments da la bova Muntogna èn daventads pli gronds e pli frequents ils ultims onns (fin a 7 meters per onn), èn periclitads er la fracziun Brinzauls ed ils conturns pli vasts da grondas crudadas da crappa e da grippa.

©Uffizi federal da topografia

La Regenza ha approvà ina contribuziun maximala da 210 000 francs or da la finanziaziun speziala da la lottaria naziunala per in'exposiziun ambulanta ed ina visualisaziun davart il rumantsch, che vegn lantschada en la Chasa dals chantuns a Berna.

Dapi il zercladur 2020 presidiescha – cun il cusseglier guvernativ Christian Rathgeb – per l'emprima giada in represchentant dal chantun Grischun la Conferenza da las regenzas chantunalas (CdC). Da questa occasiun duai vegnir profità per realisar in project davart il rumantsch e per furnir uschia ina contribuziun a favur da la diversitad linguistica sco er a favur da la promoziun linguistica. Il project è vegnì sviluppà cun l'accumpagnament professiunal da la Lia Rumantscha. Concretamain duai vegnir lantschada in'exposiziun ambulanta davart il rumantsch en la Chasa dals chantuns. Il medem mument duai vegnir montada en l'edifizi ina visualisaziun permanenta che fa endament la cultura rumantscha.

Il titel da lavur da l'exposiziun sa cloma "Rumantsch ei biodivers". L'exposiziun è caracterisada dal patratg che la Svizra è pli multifara, pli interessanta e pli colurada grazia a la lingua la pli veglia anc discurrida en il pajais. Resguardond la situaziun epidemiologica duai l'exposiziun vegnir mussada l'emprim l'atun 2021 durant circa dus fin trais mais en la Chasa dals chantuns a Berna. Suenter duai l'exposiziun ir sin viadi e vegnir mussada en ulteriurs chantuns. Ella po vegnir preschentada al public en chasas communalas, en scolas chantunalas u en autras localitads adattadas. Per che la tematisaziun dal rumantsch en la CdC fetschia ina impressiun duraivla èsi planisà – ultra da l'exposiziun – da montar ina visualisaziun permanenta en la Chasa dals chantuns. Per quest intent duai vegnir incumbensà in'artista u in artist che preschenta il rumantsch e sia relaziun cun ils auters chantuns en moda artistica.

©KdK/Simon Iannelli

La Regenza ha garantì a la Fundaziun Scalottas ina contribuziun chantunala da maximalmain 2 278 350 francs per sanar il bogn da terapia.

La Fundaziun Scalottas maina a Scharàns ina chasa per instrucziun speziala per uffants ed ina chasa da dimora per persunas creschidas cun grevs impediments corporals u cun blessuras dal tscharvè. Dapi l'onn 1973 maina ella plinavant in bogn da terapia che vegn utilisà da las abitantas e dals abitants sco er da classas da scola e d'uniuns dals conturns. Suenter ina durada d'utilisaziun da passa 45 onns na correspunda il bogn betg pli a las prescripziuns odiernas areguard la tecnica ed areguard l'architectura. La sanaziun dal bogn da terapia prevesa da betg midar las dimensiuns exteriuras dal batschigl existent. Cun mesiras architectonicas duai vegnir meglierà l'access al batschigl. Per motivs igienics vegn montà in batschigl d'atschal cromà. Pervia da sia vegliadetgna vegn er remplazzà l'indriz per preparar l'aua. Ultra da quai vegnan concepids da nov e reorganisads cumplettamain il sectur d'entrada e las gardarobas dal bogn da terapia. Ils custs totals per la renovaziun importan var 2,7 milliuns francs.

Il project per renovar ils rempars cunter la bova dal vitg a Trimmis è vegnì approvà da la Regenza cun intginas cundiziuns e permissiuns. In'analisa dals privels ha mussà che quest territori d'abitadi sco er parts da la rait da vias chantunalas èn periclitads tras auas grondas da la bova dal vitg. Igl è planisà da meglierar la situaziun da privel tras ina cumbinaziun da differentas mesiras. Tranter auter vegn auzada la capacitad da retegn dal collectur da glera existent, e quai da 3000 sin circa 8000 meters cubic. Plinavant vegn cumplettà il collectur da glera cun in indriz da retegn per reducir il privel che las punts sa staupian. In ulteriur punct debel che vegn sanà è la punt da la Via tudestga. Qua èsi previs da montar in scut cunter stuppadas per pussibilitar ina deflussiun da pressiun. Questas lavurs da sanaziun han la finamira da mantegnair er en l'avegnir il funcziunament da l'entir sistem da rempars.

Als custs totals da var 2,7 milliuns francs sa participeschan il chantun e la Confederaziun tenor la cunvegna da program da la NGF (nova gulivaziun da finanzas) en il sectur "ovras da protecziun cunter l'aua". La contribuziun chantunala importa var 540 000 francs. Tras il project da correcziun da las auas vegnan plinavant protegidas er la Via tudestga H3 e la via da Trimmis. Perquai paja il chantun supplementarmain ina contribuziun per la construcziun da vias da maximalmain 243 000 francs.

La Regenza ha approvà il project "Via da guaud Litzitobel" da la vischnanca da Landquart cun intginas cundiziuns ed ha concedì ina contribuziun chantunala maximala da 720 250 francs.

La vischnanca da Landquart ha l'intenziun da renovar la via da guaud Litzitobel e da l'adattar als basegns d'ozendi. Il project prevesa da renovar la via da guaud sin ina lunghezza dad 893 meters. En il rom dal project èsi planisà da schlargiar la via ad ina ladezza da 3 meters, da rinforzar la stresa da basa, da metter ina cuvrida da glera, da meglierar la deviaziun da l'aua, da construir mirs da crappa da bloc e paraids da fixaziun, da renovar la punt existenta, d'adattar l'access a la via chantunala e d'endrizzar – en trais lieus per lung da la via – plazzas per installar la crana a cabel e per deponer laina. Il territori dal project sa chatta al nord da Mastrils e cumpiglia las spundas taissas dal Litzitobel. La surfatscha da guaud importa 23 hectaras ch'èn determinadas dal tuttafatg sco guaud da protecziun.

Per transfurmar la Tgea Loringett (Center da Capricorns) ha la Regenza concedì a la Fundaziun Capricorn ina contribuziun chantunala da 70 580 francs en il rom da la Nova politica regiunala da la Confederaziun (NPR). La contribuziun vegn concedida en connex cun in emprest NPR da 304 000 francs.

Il project da construcziun cumpiglia l'engrondiment e la garanzia da las localitads da biro per il Parc natiral regiunal Beverin e per la Scola auta turitgaisa per scienzas applitgadas (ZHAW). Uschia vegni procurà che questas organisaziuns restian domiciliadas er vinavant a Vargistagn. Plinavant vegn engrondì il sectur public da wellness sin il plaun sutterran. Ils custs totals per la transfurmaziun importan var 1,3 milliuns francs.

En la sessiun d'avust 2019 aveva la deputada da quella giada Locher Benguerel inoltrà ina incumbensa concernent la revisiun dal concept per scolas en alloschis collectivs (incumbensa Locher Benguerel). L'incumbensa n'era betg vegnida acceptada, ma il concept da scola è tuttina vegnì examinà sin basa da tala. En quest connex è vegnì constatà in tschert basegn d'adattaziun e da precisaziun. La Regenza ha ussa approvà l'adattaziun dal Concept per manar scolas en alloschis collectivs dal sectur d'asil. Ella ha constatà ch'il concept da scola relaschà gia l'onn 2014 è da princip sa cumprovà.

Las adattaziuns preciseschan en spezial ils criteris per ch'ils uffants d'ina scola populara d'in alloschi collectiv possian midar ad ina scola populara publica. In nov raster da giudicament duai ultra da quai infurmar en moda transparenta e chapaivla las persunas responsablas per l'educaziun, pertge ch'in uffant na po betg anc midar a la scola publica u pertge ch'el duai l'emprim anc vegnir promovì meglier ed en moda pli individuala en las scolas dals centers da transit. Uschia survegnan las persunas responsablas per l'educaziun er la pussaivladad da sustegnair e da gidar lur uffant a cuntanscher las cumpetenzas necessarias. Plinavant vegnan las cundiziuns d'engaschament da las persunas d'instrucziun da las scolas dals centers assimiladas quasi dal tuttafatg a talas da las persunas d'instrucziun da la scola populara publica. Tenor il concept adattà vegn ultra da quai controllada e garantida la qualitad da las scolas regularas dals centers da transit tras l'evaluaziun da l'Inspecturat da scola, analogamain a las scolas popularas. L'emprima evaluaziun vegn fatga durant l'onn da scola 2021/2022.

La revisiun parziala da la Lescha introductiva tar l'intermediaziun da lavur e tar l'assicuranza cunter la dischoccupaziun, concludida dal Cussegl grond en la sessiun d'avust 2020, vegn messa en vigur per il 1. da fanadur 2021. En quest connex ha la Regenza plinavant approvà la revisiun parziala da l'Ordinaziun tar la Lescha introductiva tar l'intermediaziun da lavur e tar l'assicuranza cunter la dischoccupaziun. Tras l'entrada en vigur vegnan adattadas las basas legalas chantunalas als novs svilups sin plaun federal en il sectur dal e-government en l'assicuranza cunter la dischoccupaziun. Las vischnancas vegnan distgargiadas en quest sectur da lur incumbensas d'execuziun. En il futur duai l'annunzia vegnir fatga ubain en moda digitala ubain en moda persunala tar il center regiunal per intermediaziun da lavur cumpetent (CIL).