La Regenza ha deliberà la missiva tar la revisiun parziala da la Lescha introductiva tar il Cudesch civil svizzer en il sectur dal register funsil per mauns dal Cussegl grond. Qua tras duai vegnir realisada ina incumbensa dal Cussegl grond che vul abolir la limitaziun da consultaziuns da proprietarias e proprietaris da bains immobigliars.
En il chantun Grischun pon las datas da proprietarias e proprietaris da bains immobigliars vegnir consultadas dapi l'onn 2015 publicamain en l'internet sur il portal da geodatas da la GeoGR SA (www.geogr.ch). Per garantir la protecziun cunter consultaziuns da seria è il dumber vegnì limità a tschintg consultaziuns per di.
Aboliziun da la limitaziun cun mantegnair las prescripziuns da protecziun
En la sessiun da december 2019 è l'incumbensa Derungs concernent la consultaziun da datas da proprietaris da bains immobigliars en il center da geodatas dal Grischun GeoGR vegnida acceptada per mauns da la Regenza. La Regenza è vegnida incumbensada d'abolir la limitaziun dal dumber da consultaziuns da datas dal register funsil en il senn d'ina reducziun concreta da la birocrazia.
Tras la deliberaziun da la missiva e da la revisiun parziala vegn ussa ademplida questa incumbensa. La limitaziun da tschintg consultaziuns per di vegn stritgada or da la lescha. La protecziun cunter consultaziuns da seria prescritta dal dretg federal scumonda però da permetter in dumber illimità da consultaziuns da proprietarias e proprietaris da bains immobigliars, uschia ch'i dovra tuttina ina tscherta restricziun. La lescha vegn perquai cumplettada cun ina regulaziun, tenor la quala il sistem d'infurmaziun sto vegnir protegì cunter consultaziuns da seria.
Varianta da realisaziun tenor las utilisadras ed ils utilisaders
En la missiva propona la Regenza al Cussegl grond ina varianta da realisaziun per las gruppas specificas en mira. Da nov duai il dumber da consultaziuns depender dals basegns da las utilisadras e dals utilisaders. Utilisadras ed utilisaders occasiunals pon far 10 consultaziuns per di. Quai cun agid d'ina dumonda da segirezza (captcha). Cun agid d'ina autentificaziun (p.ex. registraziun u code per SMS) survegnan applitgadras ed applitgaders regulars la pussaivladad da far fin 50 consultaziuns per di.
Uschia sa lascha ademplir il giavisch dal Cussegl grond, senza che l'access liber a las datas dal register funsil, che funcziuna oz fitg bain, stoppia vegnir abolì.
Agiunta:
missiva
Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel. 081 257 23 01, e-mail Marcus.Caduff@dvs.gr.ch
Gremi: Departament d'economia publica e fatgs socials
Funtauna: rg Chanzlia chantunala