Las pretensiuns chantunalas per manar tras champs en il Grischun vegnan abolidas per ils 28 da zercladur 2021. L'Uffizi da sanadad reagescha uschia sin la situaziun epidemiologica ch'è sa meglierada. Las prescripziuns da la Confederaziun restan valaivlas.

Perquai che la situaziun epidemiologica è sa meglierada, vegn la disposiziun correspundenta da l'Uffizi da sanadad abolida per ils 28 da zercladur 2021. Uschia crodan davent l'obligaziun d'annunzia sco er la cumprova da tests dal coronavirus negativs. A partir da quel mument valan mo pli las prescripziuns federalas. Sco champ vala mintga occurrenza organisada cun dapli che ina pernottaziun.

Las gestiunarias ed ils gestiunaris da stabiliments e da manaschis accessibels al public, inclusiv alloschis per champs, sco er las manadras, ils manaders, las organisaturas ed ils organisaturs da champs, ston elavurar e realisar vinavant in concept da protecziun. L'Uffizi da sanadad appellescha da realisar quests concepts da protecziun e d'observar las reglas da distanza e d'igiena. L'accumulaziun da cas en champs po avair vastas consequenzas per las participantas ed ils participants, per lur confamigliars, per las chasas da champs sco er per las destinaziuns.

Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)

Gremi: Uffizi da sanadad
Funtauna: rg Uffizi da sanadad