Ils 19 da fanadur 2021 sa participescha cusseglier federal Ignazio Cassis a l'avertura da l'emna dal curs da rumantsch intensiv a Scuol. E betg mo quai: cusseglier federal Ignazio Cassis frequenta gist sez il curs da lingua e cuntinuescha uschia ses engaschament vivì per il rumantsch che l'ha manà gia il zercladur a Glion. Il cusseglier guvernativ e minister grischun d'educaziun e da cultura Jon Domenic Parolini, sez in Rumantsch, beneventa Cassis en ses lieu d'origin Scuol.

Savair ir enturn cun la diversitad linguistica e culturala è ina cumpetenza dumandada adina pli fitg sin quest mund. La Svizra ed en spezial il Grischun pon sa basar en quest reguard sin experientschas spezialmain ritgas e cumprovadas. En vista a quests fatgs promova il Departament federal d'affars exteriurs (DFAE) il dialog tranter las quatter cuminanzas linguisticas da la Svizra.
Sco represchentant da la minoritad linguistica taliana en la regenza naziunala enconuscha cusseglier federal Ignazio Cassis fitg bain la situaziun linguistica en il Grischun. Uschia s'occupa el er da la pli pitschna da las quatter linguas naziunalas – dal rumantsch. Ils 19 da fanadur 2021 sa participescha el a l'avertura da l'emna dal curs da rumantsch intensiv a Scuol. Beneventà ed accumpagnà vegn cusseglier federal Cassis da cusseglier guvernativ e minister grischun d'educaziun e da cultura Jon Domenic Parolini sco er dal president communal Christian Fanzun.

Da la «Emna rumantscha» als curs da lingua en Surselva ed en Engiadina
Il favrer 2021 ha il DFAE inaugurà l'emprima «Emna rumantscha» en preschientscha dal president da la regenza Mario Cavigelli e dal cusseglier guvernativ Jon Domenic Parolini. Dad ussa davent duai quella daventar in punct fix annual en il chalender, cun la finamira da render attent a la situaziun da la quarta lingua naziunala sco er da suttastritgar l'impurtanza da la plurilinguitad per la coesiun naziunala.
A chaschun da la lantschada online da la «Emna rumantscha» aveva cusseglier federal Cassis declerà da vulair approfundar sias enconuschientschas dals tschintg idioms rumantschs. Sin quai ha el visità il zercladur 2021 la classa da Glion che l'aveva envidà spontanamain ad in curs da lingua en sursilvan. Il fanadur approfundescha ussa Ignazio Cassis sias enconuschientschas da l'idiom da l'Engiadina Bassa (vallader).

Curs da lingua en rumantsch vegnan purschids en furma da curs emnils e da curs da lingua intensivs en tut las parts rumantschas dal Grischun. Organisads vegnan quels da l'organisaziun linguistica Lia Rumantscha sco er da purtaders regiunals. Els vegnan cofinanziads cun daners da promoziun da la Confederaziun e dal chantun. Ulteriuras infurmaziuns stattan a disposiziun sin www.curs.ch.

Promover e trair a niz da la diversitad linguistica chantunala sco schanza
Cun mesiras concretas vul il chantun procurar che la lingua e cultura rumantscha e taliana vegnan mantegnidas en il chantun Grischun a lunga vista. Pervia da quai èn vegnidas elavuradas 80 mesiras per promover las linguas minoritaras en il chantun Grischun. Dacurt èn vegnidas realisadas las mesiras per promover las linguas en il rom da las novas incaricas da prestaziun cun las scolas medias privatas grischunas. Ultra da quai tschertga il Departament d'educaziun, cultura e protecziun da l'ambient ina delegada u in delegà per il Post spezialisà per la plurilinguitad ch'è vegnì stgaffì da nov e cun il qual duai vegnir rinforzada la trilinguitad sco caracteristica dal chantun.

Fotografia agiuntada:

Da sanestra a dretga: Chr. Fanzun, president communal da Scuol; D. Deplazes, secretari general da la LR; cusseglier federal Ignazio Cassis; M. Stadler, directura dal turissem; J. D. Parolini, cusseglier guvernativ dal Grischun
©Dominik Täuber 

Infurmaziuns:
cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e‑mail Jondomenic.Parolini@ekud.gr.ch 

Responsabladad: Departament d'educaziun, cultura e protecziun da l'ambient