En il Grischun vegnan unifitgadas las prescripziuns da test per ils manaschis dal sectur da sanadad. En ospitals, en clinicas, en chasas da persunas attempadas e da tgira, tar la Spitex, en chasas da dimora per persunas cun impediments ed en canortas d'uffants sto il persunal betg vaccinà u betg guarì sa laschar testar a partir dals 13 da settember 2021 almain duas giadas per emna. Tgi che vul visitar questas instituziuns, sto preschentar a partir da glindesdi, ils 13 da settember 2021, in certificat COVID valaivel (testà, vaccinà, guarì), avant ch'entrar en l'edifizi..
La prescripziun da tests regulars per collavuraturas e collavuraturs betg vaccinads e betg guarids ha la finamira da proteger las pazientas ed ils pazients sco er las abitantas ed ils abitants d'instituziuns medical-socialas cunter erupziuns dal coronavirus. Tenor l'art. 40 al. 2 da la Lescha d'epidemias pon ils chantuns restrenscher l'entrada e la sortida da tscherts edifizis. Sin fundament da las medemas basas giuridicas prevesa il chantun che las visitadras ed ils visitaders ston preschentar in certificat (3G; vaccinà, testà, guarì). In resultat negativ en il rom dals tests en ils manaschis ha – tenor il conclus da la Regenza dals 7 da settember 2021 – il medem status sco in certificat 3G da la Confederaziun. Il medem status han er auters tests admess da las autoritads u da las instanzas cumpetentas.
Exceptà da l'obligaziun da far tests è il persunal da las instituziuns da la scolaziun speziala en il sectur da la scola populara sco er da las chasas da dimora en il sectur da la furmaziun fundamentala professiunala, da las scolas medias sco er dal stgalim terziar.
Sche las persunas responsablas per l'educaziun vegnan per lur uffants en las canortas, na vegn quai betg valità sco visita. Quai è pia pussaivel er vinavant senza certificat.
Divers manaschis han gia introducì l'obligaziun da far tests
Divers manaschis dal sectur da sanadad en il chantun han gia introducì l'obligaziun da far tests per lur persunal. Tras l'extensiun da las prescripziuns da test en il sectur da sanadad unifitgescha la Regenza las reglas per tut las emploiadas e tut ils emploiads dals manaschis correspundents en il chantun.
Ils tests repetitivs e sistematics dal persunal betg vaccinà u betg guarì che lavura en ospitals, en chasas da persunas attempadas e da tgira, tar la Spitex ed en canortas d'uffants vegnan recumandads da l'Uffizi federal da sanadad publica. En cas d'ina bassa quota da vaccinaziun dal persunal da sanadad e da tgira en in manaschi duai uschia vegnir reducì fermamain il privel ch'il virus vegnia importà en il manaschi. Pli bassa che la quota da vaccinaziun en las instituziuns è, e pli gronda che la ristga d'ina erupziun da COVID è.
Finamira da vaccinaziun: 800 persunas per di
L'Uffizi da sanadad constatescha en l'entir chantun in ferm augment dals dumbers da cas. Per cuntanscher en il Grischun avant l'enviern ina quota da vaccinaziun suffizienta duain 800 persunas sa laschar vaccinar mintga di durant las proximas emnas. Actualmain vegnan 5 pazientas e pazients da COVID respirads artifizialmain sin staziuns intensivas en il Grischun. Totalmain èn ospitalisadas 16 persunas.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias).
Responsabladad: Uffizi da sanadad