Il project victur ch'è resultà da la concurrenza da projects per la construcziun da la punt Son Luzi da Cuira «un solo arco» prevesa ina punt ad artg d'atschal d'ina lunghezza da 420 meters. Questa punt duai pussibilitar da colliar directamain la via dal Güglia cun la via dal Scanvetg sco er da distgargiar il traffic dal quartier Sand a Cuira.

Las prescripziuns per construir la punt Son Luzi che traversa la val eran zunt pretensiusas e las pretensiuns envers la qualitad correspundentamain autas. Il project da punt stueva medemamain persvader dal punct da vista da sia construcziun e s'integrar concepziunalmain ed ecologicamain en moda optimala en la cuntrada sco er esser abel d'obtegnair ina permissiun. Da las tut en tut 41 ideas da project ch'èn vegnidas inoltradas èn 7 projects vegnids prendids en la consideraziun pli stretga, quai en il rom d'ina procedura da qualificaziun preliminara.

Artg d'atschal d'ina lunghezza da 420 meters ha persvadì la giuria e la Regenza
Suenter in giudicament detaglià è il project «un solo arco» d'in team da planisaders sut la direcziun dal biro d'inschigneria da Cuira Conzett Bronzini partenaris SA vegnì renconuschì sco project che ademplescha il meglier ils criteris. La Regenza ha prendì enconuschientscha da quest giudicament ed ha acceptà la proposta da la giuria da persequitar vinavant il project victur. «un solo arco» prevesa da traversar la val tranter la via dal Güglia e la via dal Scanvetg cun agid d'in artg d'atschal fitg plat d'ina lunghezza da 420 meters, che ha in purtader dal vial en construcziun cumbinada. Il project victur ha persvadì la giuria cunzunt, perquai ch'il concept general da la punt ad artg d'atschal plat correspunda il meglier e sin plirs plauns a l'idea da persistenza. Malgrà sia gronda largezza è la punt tut en tut la pli curta da quellas inoltradas dals concurrents. Ultra da quai s'integrescha il sboz armonicamain en il maletg dal lieu e da la cuntrada grazia al plazzament bainponderà da las fins da la punt.

Projects da concurrenza exponids en la Villa Brügger
L'exposiziun permetta a la publicitad da vesair il project victur sco er ils ulteriurs 6 projects da concurrenza che han fatg part da la procedura da qualificaziun preliminara. L'exposiziun ha lieu dals 11 fin ils 25 da settember 2021 en la Villa Brügger, Stadtgartenweg 11 a Cuira. Las uras d'avertura per circular libramain tras l'exposiziun èn glindesdi, mesemna e venderdi da las 14.00 fin las 17.00. Il mardi e la gievgia da las 17.00 fin las 20.00 e la sonda da las 10.00 fin las 12.00 è ina persuna da l'Uffizi da construcziun bassa al lieu e dat infurmaziuns.

Project da construcziun cun ina lunga istorgia
Gia il cumenzament dals onns 1970 è vegnì elavurà in project d'exposiziun «Hochbrücke Plessur» che colliava la via dal Güglia cun la via d'Arosa. Però quest project n'è per gronda part betg vegnì enconuschent en la publicitad. In project da punt da l'onn 2008 è vegnì annullà suenter l'exposiziun sin basa d'ina sentenzia dal Tribunal federal. Silsuenter ha il Cussegl grond prendì il conclus da persequitar vinavant il project per realisar la punt Son Luzi ed ha incumbensà la Regenza da surdar a l'Uffizi da construcziun bassa l'incumbensa d'elavurar in nov project. Questa incumbensa è ussa vegnida terminada cun la premiaziun dad «un solo arco».

Fotografia agiuntada:

Visualisaziun dal project victur «un solo arco»
©Conzett Bronzini partenaris SA

Agiuntas:

- rapport da la giuria
- plan 1, plan 2, plan 3
- fegl d'infurmaziun da l'Uffizi da construcziun bassa

Infurmaziuns:

- president da la Regenza dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
- Patrick Degiacomi, cusseglier da la citad da Cuira, schef dal Departament per furmaziun, societad e cultura, tel. +41 81 254 44 00
- Matthias Wielatt, schef Construcziuns artifizialas, Uffizi da construcziun bassa, tel. +41 81 257 37 77, e-mail Matthias.Wielatt@tba.gr.ch

Responsabladad: Departament d'infrastructura, energia e mobilitad