Il chantun Grischun prenda mesiras supplementaras per cumbatter la derasaziun da la pandemia en las scolas. En las regiuns Plaun, Landquart, Moesa, Plessur, Partenz, Surselva e Viamala vala a partir da proxim mardi a partir da la 3. classa primara fin e cun il stgalim superiur in'obligaziun da purtar ina mascrina. Ultra da quai vegnan fatgs ils tests en las scolas da las regiuns Plaun, Landquart e Plessur duas giadas l'emna enstagl d'ina giada.

Il Grischun registrescha actualmain ils pli auts dumbers da cas da corona dapi il cumenzament da la pandemia. Pertutgadas èn oravant tut las generaziuns pli giuvnas: En la perioda tranter ils 8 ed ils 14 da november 2021 pertutgan 33 pertschient (325 da 973) da tut ils cas persunas fin 20 onns. Correspundentamain tutga la 5. unda actualmain fermamain las scolas. Per franar la derasaziun dal virus e per reducir ils cas da COVID che vegnan transferids da las scolas en chasadas, introducescha la Regenza – en las regiuns ch'èn il mument fermamain pertutgadas da la pandemia – in'obligaziun da purtar ina mascrina a partir da la 3. classa primara.

L'obligaziun da purtar ina mascrina a partir da la 3. classa primara fin e cun il stgalim secundar I vala a partir da mardi, ils 23 da november 2021 per entant fin tar las vacanzas da Nadal en las regiuns Plaun, Moesa, Landquart, Plessur, Partenz, Surselva e Viamala en tut las scolas popularas publicas e privatas, mintgamai sin l'entir areal da scola e per tut las persunas. Per meglierar il screening en las scolas da las regiuns pertutgadas fermamain (Plaun, Landquart e Plessur), vegn augmentada l'intensitad da testar: enstagl sco fin ussa ina giada l'emna, fan las scolas per il mument duas giadas l'emna ils tests en scola. La fin da december 2021 vegn la situaziun giuditgada da nov ed i vegn decidì davart l'ulteriur proceder.

L'obligaziun da purtar ina mascrina ed il screening pli frequent duain gidar che l'instrucziun a preschientscha possia cuntinuar en moda segira e che la furmaziun possia vegnir garantida per tut las scolaras ed ils scolars en il chantun Grischun. Quai gartegia il meglier, sch'il manaschi da scola po avair lieu cun l'instrucziun da preschientscha.

En las instituziuns da furmaziun dal stgalim secundar II (scolas professiunalas spezialisadas, centers da curs intermanaschials, lavuratoris d'emprendissadi, purschidas transitoricas, scolas medias) vala per tut las persunas en locals interns da l'areal da scola ina recumandaziun da purtar ina mascrina.

Dapi las vacanzas d'atun mussan ils tests da pool en las scolas in cler augment
Fertant ch'igl ha dà en l'ultima emna d'october anc 33 pools da classa cun in resultat positiv e 25 persunas singulas testadas positiv, èn ils dumbers s'augmentads entaifer duas emnas sin 93 pools da classa testads positiv e 122 persunas singulas cun in resultat positiv en l'emna chalendara 45. Pertutgadas èn surtut las scolas primaras.

En la media a lunga vista ha stuì vegnir ordinà la quarantina resp. l'instrucziun a distanza en media mo per ina classa per emna. En l'ultima emna (emna chalendara 46) han entaifer mo 2 dis 10 classas stuì midar a l'instrucziun a distanza.

La derasaziun da la 5. unda sa mussa regiunalmain cun grondas differenzas. Fertant che las regiuns Landquart, Plessur e Plaun èn actualmain pertutgadas fitg ferm, èn ils dumbers da cas en las Regiuns Engiadin'Ota, Engiadina Bassa, Bregaglia e Bernina il mument anc fitg bas ed i èn strusch vegnids registrads pools da classas testads positiv.

1599 Persunas en isolaziun
Dapi las vacanzas d'atun vegn registrà er ordaifer da las scolas in ferm e grond augment dals dumbers da cas en il chantun Grischun. La media da 7 dis è latiers s'augmentada dad 11 cas per di, ils 12 d'october 2021, sin 73 cas per di, ils 12 da november 2021. Actualmain vegnan annunziads passa 200 cas per di. 1599 persunas sa chattan il mument en isolaziun (stadi dals 20 da november 2021. Dapi ils 18 d'october 2021 è il dumber d'ospitalisaziuns da persunas malsaunas da COVID-19 sa dublegià, entaifer in mais da 17 sin 37 (stadi dals 20 da november 2021). Sin las staziuns da tgira intensiva èn 5 da 16 letgs (stadi dals 20 da november 2021) occupads da pazientas e pazients da COVID-19. I sa tracta qua per gronda part da persunas betg vaccinadas.

Ils auts dumbers da cas ed il ferm augment – cumpareglià cun las undas avant – pon ins declerar cun la preschientscha da la varianta delta e cun la stagiun pli fraida. La varianta delta è pli che dubel uschè contagiusa sco la varianta oriunda dal virus ed il privel ch'ina persuna sto vegnir ospitalisada u ch'ella dovra tgira intensiva è medemamain per circa 50 pertschient pli aut. Ultra da quai è la concentraziun da virus savens pli gronda en locals interns, quai che po medemamain manar ad in decurs pli grev da la malsogna. En locals interns cun pli che 20 persunas resti perquai impurtant da dar aria curt e savens (mintga 20 minutas) sco er da purtar ina mascrina. Quai vala per exempel per stanzas da sesidas. Ordavert è il privel da s'infectar dentant plitost pitschen.

Excepziuns da l'obligaziun da purtar ina mascrina:

• ordavert dastgan ins prender giu la mascrina, sch'igl è pussaivel d'observar ina distanza dad 1,5 m;
• las lecziuns en ils secturs da sport, da musica, da chant e da teater en locals interns ston vegnir manadas tras cun adattaziuns (1,5 m distanza u obligaziun da purtar ina mascrina);
• activitads sportivas d'uniuns en implants da sport da las scolas;
• per persunas che pon cumprovar ch'ellas na pon betg purtar ina mascrina per motivs spezials, particularmain per motivs medicinals ston vegnir prendidas autras mesiras per sa proteger cunter infecziuns;
• sur lur medias e medis d'instituziun pon las instituziuns da la scolaziun speziala fixar – en cunvegnientscha cun la media chantunala resp. cun il medi chantunal – excepziuns motivadas da l'obligaziun da purtar ina mascrina.

Infurmaziuns:

Post da communicaziun per il coronavirus dal chantun Grischun, e-mail kfsmedien@amz.gr.ch, Tel. +41 79 716 22 95 (mo per collavuraturas e collavuraturs da las medias)


Responsabladad: Uffizi da sanadad / Departament da giustia, segirezza e sanadad / Departament d'educaziun, cultura e protecziun da l'ambient