Avant stgars 10 onns han las tschintg vischnancas d'Arosa, Flem, Luzein, Tusaun e Vaz Sut lantschà l'introducziun dal nov model armonisà da contabilitad MAC2. Sco vischnancas da pilot èn ellas stadas las emprimas vischnancas en il Grischun che han prendì per mauns la sfida da s'occupar cun las novaziuns. Dapi l'onn da gestiun 2019 han tut las vischnancas grischunas realisà il MAC2. In fatg positiv per la Regenza è l'introducziun successiva dal MAC2.

Tut las vischnancas grischunas han introducì successivamain il nov model armonisà da contabilitad 2 – curt MAC2 – ed han pia bandunà il model da contabilitad MAC1. Cun il MAC2 mussan las corporaziuns publicas in maletg signifitgant da la situaziun effectiva da la facultad, da las finanzas e dal retgav (princip da «true and fair view»). Il rendaquint s'avischina uschia a l'economia privata ed a las reglas internaziunalas.

Introducziun successiva sco via da success
Las basas giuridicas per l'introducziun dal MAC2 èn entradas en vigur il 1. da december 2012. A las vischnancas è vegnì concedì in temp transitoric da 5 onns per adattar lur dretg da finanzas a la nova lescha. Vischnancas fusiunadas han pudì spustar l'introducziun en il cas singul per 1 onn.

Cun il MAC2 han las 158 vischnancas ch'existivan anc l'onn 2013 stuì far ina midada che ha chaschunà custs e lavur. Perquai è la Regenza sa decidida per in proceder successiv. Per ella n'eri ni politicamain raschunaivel ni objectivamain necessari d'introducir il MAC2 il medem mument, sco quai ch'igl è vegnì fatg en auters chantuns.

Entaifer il termin fixà han las vischnancas pudì decider sezzas, cura ch'ellas veglian introducir il MAC2. Uschia han ellas survegnì la pussaivladad da prender per mauns la midada tut tenor ils basegns sco er tenor la chargia da temp e da persunal. Il termin fixà è vegnì observà. Duas vischnancas fusiunadas han introducì las novas prescripziuns da rendaquint per l'onn 2019. Ord vista da la Regenza è l'introducziun dal MAC2 reussida ed è stada in success, cunquai ch'ella è vegnida realisada senza incaps ed entaifer il temp fixà.

Plivalur per las vischnancas grazia al MAC2
Il MAC2 n'è betg in remplazzament, mabain in svilup da l'anteriur model armonisà da contabilitad MAC1. Il nov rendaquint procura per transparenza areguard la situaziun da la facultad, da las finanzas e dal retgav ed augmenta la cumparegliabladad dals quints annuals. Ensemen cun in reporting excellent è il MAC2 in agid da direcziun e da planisaziun per las autoritads ed in med per infurmar en moda transparenta las votantas ed ils votants sco er terzas persunas.

Cumpareglià cun il MAC1 resulta – tras l'introducziun dal MAC2 – per regla ina facultad finanziala pli gronda (schliaziun da reservas zuppadas) e dapli agen chapital sco er custs d'amortisaziun futurs pli bass. Ni las investiziuns nettas ni l'atgna finanziaziun na vegnan influenzadas essenzialmain dal MAC2 cumpareglià cun il MAC1.

Funcziunalitad e divergenzas dal standard
Cun plaschair ha la Regenza prendì enconuschientscha dal fatg ch'il rendaquint e la contabilitad da las vischnancas grischunas correspundan en general als novs standards da rendaquint. Divergenzas èn visiblas mo en cas singuls e na pon betg vegnir giuditgadas sco cuntravenziuns considerablas.

La via grischuna, cun l'introducziun successiva dal MAC2 durant plirs onns, po vegnir valitada sco success. Cun plaschair ha la Regenza prendì enconuschientscha dal fatg ch'il MAC2 è vegnì introducì e realisà cun success en las vischnancas grischunas, ch'il nov model da rendaquint è sa cumprovà e che las lavurs han pudì vegnir accumpagnadas, sustegnidas e promovidas cun agid da resursas chantunalas. La Regenza engrazia a tut las vischnancas, a lur autoritads sco er a lur collavuraturas e collavuraturs per la lavur fidada che ha insumma pir pussibilità quest facit positiv.

Infurmaziuns:

• cusseglier guvernativ dr. Christian Rathgeb, schef dal Departament da finanzas e vischnancas, e‑mail Christian.Rathgeb@dfg.gr.ch (betg cuntanschibel per telefon)
• Thomas Kollegger, manader da l'Uffizi da vischnancas, tel. +41 81 257 23 81, e‑mail Thomas.Kollegger@afg.gr.ch