Las cifras cumprovan: Las dunnas èn sutrepreschentadas en la politica dal Grischun. Ils 23 da favrer 2022 vul il Post da stab per l'egualitad da las schanzas motivar dunnas giuvnas interessadas da s'engaschar, quai cun in'occurrenza d'infurmaziun e da colliaziun. Il post survegn il sustegn da las partidas giuvnas grischunas, da la Sessiun dals giuvenils e da politicras giuvnas dal Cussegl communal da Cuira e dal Cussegl grond.

L'interess politic cumenza savens gia en la giuventetgna, saja quai tras discurs en famiglia cun ils geniturs e parents, tras l'instrucziun en scola ubain er tras discussiuns cun amias ed amis. Per ch'i sa sviluppia or d'in interess politic er in engaschament politic, sto quel vegnir promovì activamain. Il Post da stab per l'egualitad da las schanzas rinforza quest potenzial ils 23 da favrer 2022 cun in'occurrenza d'infurmaziun e da colliaziun per dunnas giuvnas. «Igl è necessari da s'adressar sistematicamain a persunas giuvnas creschidas, perquai ch'i dovra diversas vistas en la politica», di il cusseglier guvernativ Jon Domenic Parolini. Il post da stab è situà en ses Departament d'educaziun, cultura e protecziun da l'ambient. L'integraziun da pliras perspectivas mainia a modas d'avischinaziun innovativas a problems ed a fatgs. «Er per mantegnair il sistem da milissa è la recrutaziun da persunas giuvnas centrala», uschia Jon Domenic Parolini.

Las dunnas giuvnas mancan en la politica dal Grischun
Tenor il studi PROMO 35 da la Scola auta spezialisada dal Grischun èn actualmain mo 6 pertschient da tut las persunas en la politica communala pli giuvnas che 35 onns. Cunzunt tar las dunnas exista in basegn da cumpensaziun. Actualmain èn represchentadas en la Regenza grischuna 0 pertschient dunnas, en il Cussegl grond èn quai 20 pertschient ed en radund 10 pertschient da las vischnancas grischunas surpiglian dunnas il presidi. En Svizra datti differentas furmas da politica. Da partidas a moviments politics fin a la participaziun a parlaments – il spectrum politic è vast e las pussaivladads da sa participar e da sa far valair activamain en la politica èn multifaras. Savens n'è la partenza en la vita politica dentant betg uschè simpla e la malsegirezza da savair, nua ch'ins tutga per propi ed a tgi ch'ins po sa drizzar, è gronda. Per consequenza èn il barat cun politicras che han experientscha e la funcziun d'exempel dad ellas da gronda impurtanza.

Dunnas giuvnas survegnan access a la politica dal Grischun
Cun l'occurrenza d'infurmaziun e da colliaziun «Politicras giuvnas: Entrai per plaschair!» dals 23 da favrer 2022 vul il Post da stab per l'egualitad da las schanzas sa drizzar a dunnas giuvnas interessadas a la politica d'ina vegliadetgna tranter 13 e 30 onns. Da las 17.00 fin las 20.15 pon ellas s'infurmar davart las pussaivladads da la participaziun politica e sa barattar cun dunnas da medema opiniun, cun politicras e cun activistas, quai en la Biblioteca da la citad da Cuira. L'occurrenza è ina cooperaziun dal Post da stab per l'egualitad da las schanzas e da la Sessiun dals giuvenils dal Grischun. Preschentas e preschents vegnan ad esser represchentantas e represchentants da las partidas giuvnas grischunas dal spectrum da la sanestra fin la dretga, sco er politicras giuvnas dal Cussegl grond e dal Cussegl communal da Cuira ed er il cusseglier guvernativ Jon Domenic Parolini. L'occurrenza è in'activitad da cuntinuaziun suenter il 4. Parlament grischun da mattas dals 11 da november 2021 ed in pass intermediar a la Sessiun dals giuvenils da l'atun 2022.

Infurmaziuns:

Responsabladad: Post da stab per l'egualitad da las schanzas